Olõ no kolm kuud oppaja olnu. Tuud külh väiku aoga õnnõ katõl pääväl nädälin. Sõida tuujaos Võrolt Tal’nalõ, et üten põhikoolin kuvvõndilõ klassõlõ hispaania kiilt jaka.
Et olõ varrampa päält kümne aasta tennü uma käe pääl tüüd ja opanu õnnõ suuri inemiisi, sis vaih om perädü suur. Seod ettepanõkit võti suvõ lõpun nigu seigelüst, vahtsõt ja põnõvat välläkutsõt. A joba kuu ao peräst sai arvo, et seo om küländ väsütäv seigelüs. Nii vaivatu olõ-i ma ammu olnu.
Tõtõ om tuu, et põhikooli oppaja piät olõma ka kasvataja, sotsiaaltüütäjä, politsei, psühholoog, mõnikõrd latsilõ ka imä ja sõbõr. Olõ seo kolmõ kuuga nännü ikvit oppajit ja koolilatsi, koolikiusamist ja muud säänest, miä ülearvo hõisku ei sünnütä.
Olõ nõun üte inneskidse koolioppajaga, kiä ütles, et kõik, kiä tegevä oppajatüüd, omma väärt avvustamist. Kõik, kiä seod häste tegevä, omma väärt ülemasmist, kinnimasmist ja ülekullatamist. Kiä ütlese, et asi om tõisildõ, võinu esi perrä pruuvi. Arvada olnu nä seoga õkva nõun, ku omma pääväkesegi oppajatüüd tennü.
Olõ nõun ka tuuga, et seo tüü man om väega kerge läbi palla. Oppaja sälän om suur vastutus, selle et tä ei anna edesi õnnõ tiidmiisi määndsestki opiainõst, a piät olõma ka iinkujo, tugõma, silmi valla pästmä, mõotama. Määndsest immelättest võtt oppaja kõik tuu energiä ja väe?
Ka aig, miä om viil pääle koolitunnõ opitüüga köüdet, om peris suur. Tulõ paranda töid, tunnõ ette valmista, e-kuuli asjo sisse kanda. Ku tahtsõ alostusõn umma tüüd suurõmba himoga tetä, kullu tuu kõgõ pääle viil neli vai viis tunni pääle kuuli.
Hengega oppajatüü tegijist saava palgaga rahul olla nuu, kiä tegevä ületunnõ vai muid projektõ, kost tulõ lisarahha. Vai sis omma naisoppajil tõõsõpoolõ, kiä näid rahaga tugõva.
Oppajatüü väärtüsest arvosaamisõ man piät midägi suurõn plaanin ütiskunnan muutuma. Om jo kuulmeistre tuu, kiä kujondas väärtüisi ja kellega kuun nuur inemine inämbüse umast pääväst müüdä saat. Torssunu ja läbipalanu oppaja olõ-i kellegi jaos iinkujo. Oppajatüüd tulõ hulga inämb hinnada ja tähtsäs pitä.
Lumiste Kati
Kiränik Lumiste Kati and värskit mõttit, kuimuudu egäpääväello vaeldust löüdä ja märgotas tuust, miä parasjago süäme pääl.
