Põlva kandi ansamblil Kõhukesed om valmis saanu vahtsõnõ laul ja muusigavideo päälkiräga «Kõo Kusta sannankäük».
«Taa om Lindmetsa Elmari perrä lõõdsalugu, millel es olõ sõnno. Kunagi sai Elmari poja Lindmetsa Harri käest küstüs, kas taal laulul omma sõna, ja sis Harri ütel’, et midägi esä hõigas’ sekkä külh. A nuu olli ütsigu lausõjupi, mis olli Harrilõ miilde jäänü. Ütskõrd trehvsimi Harri ja Pulga Jaaniga kokko ja Jaan ütel’, et mis nuu sõna sis tetä omma. Ja ütekõrraga olliki täl sõna valmis. Tuu oll’ aasta tagasi,» seletäs ansambli Kõhukesed vidäjä ja videotegemise kõrraldaja Kaha Kaido.
Kõo Kusta oll’ olnu umal aol, vast nii sada aastat tagasi, Varstu kuulmeistre. Timä nimi oll’ seo pilliluu päälkirän olõman ja sai ka laulusõnno sisse. «Jaan tegi säändse häste külmä ilma sõna, et viivõtumulk om ijän ja ku sälg süüdäs, kuis tuu sannankäümine sis vällä näge,» kõnõlõs Kaha.
Ku laul Äniläse Piitre stuudion linti sai, tull’ õkva plaan video kah tetä. Tuu jaos kõnõl’ Kaha Kaido lavastaja Tagametsa Tarmoga ja ütenkuun märgiti vällä sääne lugu, kon näüdätäs õnnõ sannankäümist, bändi ega midägi muud ei olõki. Kõo Kustat kutsuti mängmä Mooste miis Needo Ülo ja üles võtma videomiis Nagla Lauri. Löüti sääne sann, miä kõlvas’ video tegemise jaos, ja naati pääle. «Plaan oll’ säändene, et teemi nal’alidsõ nuka alt vanaaigsõ video muudu filmi. Tan omgi vähekene Chaplini muudu pilti kipõmbas tettü ja vähäkene filmilindi efekti kah man, et olõs selge: taa juhtu vanal aol. Needo Ülo tekk’ õkva tuud, midä filmi säädjä ja kaamõramiis tahtsõva. Pidimi esiki kiildmä, et olku hää ja käkkü tuud kotust, mille peräst video Youtube’i kanalin är võidas keeldä,» kõnõlas Kaha Kaido. «Ku taa video vällä tull’, sis edimäne asi, mis päähä lei, oll’, et taa om savvusanna sõsaridõ vastand: suidsusanna veli,» pruuv tä umma videot kuulsuisi paistõl reklaami.
Laulun ja videon om tsipa säändsit asju, miä võiva täämbädsel aol võõra vai imeligu olla, näütüses kusõga ravitsõminõ. «A ma kõlisti Kõivupuu Marjulõ ja tä kinnit’ mullõ, et olõmi õigõl tiil: jah, vanastõ ravitsõdi kusõga, jah, perse om võro keeli iks perse,» kõnõlõs Kaha.
Kõhukesed om ansambli, miä tege rahvalikku muusikat ja pruuv umma kavva inämb umaloomingut ja võrokiilset teksti tuvva. Näide laulõlõ omma sõnno tennü Antoni Annika ja Pulga Jaan. Ansamblin mängvä Ojasaarõ Toomas, Mängli Aksel, Saarõ Ivari ja Kaha Kaido.
Vahtsõ luu omma siiäni häste vasta võetu, esieränis suurõ fänni omma Kaha Kaido jutu perrä nuu võrokõsõ, kiä omma muialõ elämä lännü. Seo keväjä om ansamblil iin kats suurõmbat ülesastumist: Kõhukesed om simmanibänd nii Kagu-Eesti tandsupidol ku ka Umal Pidol.
Rahmani Jan
Videot saa kaia tast: https://youtu.be/00j8tlLz9XE?si=ZCzQIC99eMp3XMQc
Nagla Lauri, Needo Ülo ja Tagametsa Tarmo video ülesvõtmisõ aol sanna man. Kaha Kaido pilt
Pilt videost: Kõo Kusta pand sannaahjo puid.
