Minevä nädälivaihtus peeti Rõugõn jutu kõnõlõmisõ festivali Ööbikuööd. Tego om Eesti rahvakultuuri keskusõ festivaliga, mink mõtõ om nõsta üles jutukõnõlõmist ku aolda ja tähtsät kultuurinättüst. Et festival oll’ imäpäävä nädälivaihtusõl, olli inämbüs kõnõlduid juttõ köüdedü imäs olõmisõga.

Säänest festivali kõrraldõdi joba neläs aasta, a varrampa om olnu jutukõnõlõmist mitmõn esi paigan. Seokõrd olli kõik tegemise ütte paika, Rõugõlõ, kokko tuudu.

Festivali kõrraldaja Suitsu Kadri ütel’, et vahtsõt vormi prooviti tuuperäst, et sis saava jutuhuvilidsõ kokko tulla ja ei piä Eestit pite ümbre sõitlõma. A mille Rõugõ? «Tan omma Eesti Imä monument ja Ööbikuorg. Rõugõ om üts mu lemmikpaiku. Mul om nii hää miil, et mi valisimi seo paiga. Kõik om tan nii õigõ: lämmi vastavõtt, edimädsest hetkest om hää tunnõ, et tan om meid oodõtu,» selet’ kõrraldaja.

Timahavadsõl jutu kõnõlõmisõ festivalil asti üles Õunapuu Lauri, Turovski Aleksei, Kaikkoneni Erki Kari, Tšerkassova Polina, Kihulasõ Meelis, Sepä Vahur ja Mikita Valdur. Kavan olli ka «Üü-ülikooli» loengidõ avaligu ülesvõtmisõ, kon kõnõli Tammõ Epp ja Karo Roland. Muusikat teivä Mäeotsa Kapell, Kandlõ Oss, Suitsu Juhan ja Hinrikusõ Henrik, ansambli Uurikad ja Wänt ja Wõll.

«Kõik om plaani perrä lännü ja henge pututanu. Ja häämiil om tuust, et kullõma om tulnu hulga Võromaa rahvast,» oll’ kõrraldaja Suitsu Kadri pidoga rahul.

Jutupido Rõugõn lõppi Ööbikuoron pühäpäävähummogudsõ tsirgukullõmisõga, midä võtt’ iist Päkä Margit.

Rahmani Jan

Jutupidol es aeta õnnõ juttu. Näütüses Kihulasõ Meelis pand’ kullõja paiupulki kuurma. Rahmani Elo pilt