Alostus eelmädsen lehen.
3. Tuhkri, rebäse, kanakulli, nugissõ. Tuhkri om väiku elläi, imätuhkri vaivalt suurt kanna murd. Poigõ küll. Valgust pelgäs. Esätuhkri murd kõiki, eriti partse, aga päämidselt õnnõ aprillikuu, ku aelõmisõ aig om läbi ja kere kurnatu. Avitasõ kastlõks ja raua. Mu praktika joosul om õnnõ üts imätuhkri raudu lännü, todagi tagajalga piten.
Rebäse vasta om kats kohtunikku: haavlipüss ja pini. Püssäst jäi ma ilma haiglan videlemise peräst, es jõua lupa pikendämä. Pini sai jäetüs hindäle Lääne-Siberi laika ja hoovipini ristand. Inemist tä ligi es lasõ, ketti tedä panda es saa, huvi tundsõ ainult lambiide vasta. Es murra. Haiglan mõtli, et nüüd om kannuga rahu majan, aga ei. Alla aastanõ imäne kutsik oll’ kana kah hindä kaitsõ alla võtnu. Mu vabakäigu pini hoit (siiämaani) är ka kanakulli rünnäku.
Nugistõga om asi keerulidsemb. Eesti kats nugissõliiki – mõtsnugis ja kivinugis – omma tutva päämiselt jahimeestele, tuuperäst pantas näide murtu kana õks tuhkriide arvõlõ, mis om tävveste võlss. Ku om murrõt inämb ku üts kana, om mängun nugis. Kokkuvõttõs: kanapidäjä piät tsipakõsõ ka jahindust tundma. Uma lähembä ümbrusõ taimi ja eläjide tundmine om Eestin ülepää nõrk.
Ahjaa – kanamunnõ söövä nii tuhkri kui roti. Häötämist tulõ alusta rottest, sis või juhtuda, et tuhkri süü mürgitet roti är ja lätt esi kah hingusõlõ.
4. Nakkushaigusõ. Pall’u pellätü tsirkõ katk kõiki kanatõugõ ei putu (sumatra, araucana). Mõttõkas olõsi pidädä noid tõugõ.
Kanakasvatusõst vahel puulmuidu saadu munakana om üts hädäabinõu. Ma ildaaigu pruuvsõ viie pruuniga. Kolmõ nädäliga jõudsõva kõik viis hindä rebäse lõugu vahelõ sokuta.
5. Pesä. Nuu piat inemine lavvust kokku lüümä, kana suurusõ perrä. Kõgõ alla soovita panda tuhka, sis ei tulõ vereimejä nii ruttu pessä elämä. Ku om määnegi mõtõ, et võinu osa munnõ haudõlõ panda, piat nuu muna olõma ilma ütegi sitatäpildä, muidu jääse mädäs. Puhtiid munnõ saat õnnõ nii, et vahetat kõrdapiten pesämaterjali ja korjat kats kõrda päävän muna är. Külmä ei tohe kah ligi laskõ.
Jaa, ei olõki kanapidämine tiid mia lihtsa, ku asja kõrralikult aia. Ja mõnõlõ või sisepalamismootori tüüpõhimõtõ arusaadavamb olla.
Pulga Jaan
