Säitsmemagajapäävä perrä om iks hainaaos ilma ennustõt. Tuuperäst mõtli kirota priinimest Pilv. Nimel om Eestin 283 kandjat. Vana nimi panti õnnõ viien Liivimaa ja katõn Eestimaa kubermangu mõisan.
Edimäne oll’ 1809. aastagal Sabõrna mõisa Kanepi kihlkunnan Raudsepä Peebulõ ja velele Märdile pant nimi. Nime Pilw kõrval panti sääl ka Rais ’räüss’? ja Pikne. Sabõrnan panti ka tõnõ nimi Pilwe, a tuu es lää edesi. Karula mõisa Pilw panti läskmehele tütrega, ka tuu nimi es pruugi edesi minnä. Küll om üts suurõmb Pilve suguvõsa peri Vahtsõliina mõisa lahuntükü päält Holdi küläst, miä parhilla om Haani kant. Ka Vahtsõliina pastor Masing soovit’ talupoigõlõ nimmi lihtsalõ sõnnu perrä.
Põh’a-Tartumaa Pilw panti Alatskivi mõisa Kükita külän. Nime saajidõ varatsõmbat lisanimme olõssi nigu kirutõt Põela (küländ vanan keriguraamatun joba õ-tähte pruukin). Luke mõisan Nõo kihlkunnan panti kah Pilw, Õiguse (Oigusse) Jaani ja Reinu perrile, a sääl pantu nimi kuuli vällä. Põh’a-Eesti Pilv tulõ kas Järva-Madissõ Ageri mõisast vai Rakvere Karitsa mõisast.
Üts tähendusega ’pilv’ nimi panti viil. Tuu oll’ Rõngu kihlkunna Aagre mõisan, kon keriguraamatun om Pilf, a hingelugõmisõn kiräviaga Pilg. Tegeligult läts’ edesi Pilf, tuu nimi püssü alalõ pia 20. aastagasaa lõpuni.
Aagren om nime saajidõ esä nimi olnu Piitre, Karulan nime saaja hindä nimi Piitre. Nii või kahtlusta alliteratsiooni mõjju: Pilve-Piitre.
1921. aastagal Petserimaal võeti Pilv kolmõl kõrral, erälde perre Petseri, Irboska ja Lobotka vallan.
Eestistämisel võeti nimme Pilv peris hulga, 22 kõrral. Kümnel kõrral oll’ inne p-algusõga nimi: Paalberg, Peekmann, Perk, Piilov, Pil(l)-mann, Pois(s) ja Pumpernikel. Mitu nimevõtmist oll’ viil nimmiga Beilmann (Salla vald), Grosberger ja Niilmann (Roela vald). Üts Pilfi pere eestist’ uma nime Pilvistes.
Nimel Pilve om Eestin 100 kandjat. Vana nimi om tegünü nii, et mainitu Järvamaa Ageri mõisa Pilw muutu Rakveren kujulõ Pilwe (vast tuuperäst, et tetä vahet Rakvere lähkün paigapääl tegünü nimega). Petserimaal võeti Pilve katõl kõrral. Päämidselt om Pilve eestistedü nimi, tuu kotsilõ om 35 eestistämise akti.
Saarõ Evar
Rubriigin kõnõldas perekunnanimmi periolõmisõst ja tähendüsest.
