Timahavanõ festival «Aigu om!» peetäs 15.–21. hainakuuni ja om vällä kuulutõt ku Jaapani-eri.

Misperäst tuu nii om ja kuis jaapanlaisi ja võrokõisi kultuuri ütstõist tävvendäse, seletäs festivali ellokutsja ja kõrraldaja Kalkuna Mari:

«Ma olõ esi säidse kõrda Jaapanin käünü, a tuu oll’ jo ammunõ unistus jaapanlaisi siiä Võromaalõ tuvva. Uskmalda lugu, a parhilla kuuntüün Tartu 2024, RMK, Rõugõ valla, Võromaa arõnduskeskusõ ja mitmidõ sõpruga Jaapanist saa taa asi teos. Mi olõmi taa as’a jaos kõvastõ tüüd tennü ja võtami sõs festivalil vasta üle 15 Jaapani muusigu, mõtsamehe, sõbra ja külälise.

Tähtsä ütine asi om luudusõusk. Kõgõ Jaapanin kävven om mul olnu sääne tunnõ, et meil om midägi ütist ja midägi suurt, midä mi saami ütstõsõlt oppi. Timahavanõ festival pakk võimalust toolõ küsümüsele vastussit otsi ja jaapani kultuuri sisse kaia, a tetä tuud kesk Võromaa mõtsu. Pähni mõtsapääväle 18. hainakuul tulõva meil Jaapani mõtsamehe ni üts erakmunk ja saava kokko Eesti mõtsamõtlõjidõga. Üüse saa viil kaia välikinno ja terve päiv om massulda. Kõik tuu sünnüs jaapani-eesti-jaapani sünkroontõlkõn (mõni vabatahtlik või tulla võro kiilde kah ümbre pandma!).

Mul hindäl om illos kuuntüüprojekt Jaapani muusikidõ elektrikitarrist Arata ja tšellist Kotaroga, miä näge ilmavalgust «Aigu om!» festivalil. Naa kats kontsõrti 19. ja 20. hainakuul ommaki ainukõnõ võimalus taad kavva Eestin kuulda. Tuu om sääne häste rahulinõ ja edesiliikja muusiga. Ma olõ uma hainaküünü Viitinän naidõ katõ kontsõrdi jaos kõvastõ putitanu. Pääle tuud saa esi viil kuulda ni pruuvi Jaapani taiko-trummi mängu.

Nälgä joht kah ei jää, selle et meil om kavan Jaapani söögi päiv ja egä päiv om vallalõ mõni paigapääline kohvik, «Viitinä kuuritsa» aigu kodokohvigu. Olkõ terve tulõmast!

PS. Ka jaapani ja võro tenosõna omma tsipa üttemuudu – aituma ja arigato!»

Kalkuna Mari Tokyon J-WAVE raadion festivali tutvustaman. Tego om Jaapani pääliina väega tähtsä raadioga, midä kullõs egä päiv miljon inemist. Pilt Kalkuna Mari FB-lehe päält