Timahavadsõ kultuuripääliina Tarto ja Norramaa Bodø vidävä kuuntüüprojekti, miä om tsihit võro, seto, mulgi ku saami nuurilõ, et edendä umakultuuri hoitmist. 5.–10. piimäkuu pääväl kävemi Bodø liinan saami nuuril külän.

Tuu aoga jõvvimi tetä ja nätä peris pall’o. Kävemi Bodø kontsõrdimajan kuninganna Sonja kunstiavvohindo jagamisõl, Stormeni raamadukogon ilolidsõmbidõ Eesti raamatidõ näütüse vallalõtegemisel, Bodø toomkerikon kontsõrdil, jõvvimi oppi saamõ perimüslist lavvamängu dablot ja teimi muud põnõvat.

Suurõmb jago projektist olli arotõlõmisõtsõõri saami nuuriga, kon saimi nii umavaihõl tutvas ku rohkõmp teedä ja kõnõlda umast kultuurist ja elo-olost. Nii saimi ütelt puult tutvambas saami kultuuriga, a sammamuudu ka võro, seto, mulgi ja haani elo-olo, keele ni meelega. Saimi arvo, et nii ku om meil asjo tõisildõ, om ka pall’o ütist.

Päält põnõva programmi jäi meil aigu tunda mõnno polaarpäävä valgist öist muuli pääl istõn, sääl uma- ku saamikeelitsit laulõ lauldõn, ütstõõsõ rahvatandsõ ja tsõõrimänge oppõn.

Taa projekt oll’ mi kõigi jaos silmi vallalõ tekev ja suurõ mõoga kogõmus. Oll’ võimsa nätä, et periselt ommaki olõman naa noorõ, kiä hindä kultuurist huulva, kiilt avvo seen hoitva ni uman keelen kõnõlõsõ.

Põimukuul oodami saami nuuri hindä mano küllä, et näüdätä näile umma.

Jüvä Hellä

Eesti kamp: Kadri Laanmets (Tarto 2024 Lõuna-Eesti projekte tallitaja), Getter Lauk (mentor), Emilia Berg (seto nuur), Annela Laaneots (Tarto 2024 Lõuna-Eesti kõrraldaja), Robin Liiber (mulgi nuur), Joonas Leis (Tarto 2024 Extendedi projekti nuur), Hellä Iva (võro nuur), Sirlen Vodi (haani nuur), Hella Õitspuu (mulgi nuur), Rasmus Itse (seto nuur).

Norra luudusõn matkaman.

Bodø raamadukogon Eesti raamatidõ näütüse vallalõtegemisel.