Timahavanõ Seto kuningriigi päiv peetäs puulpäävä, 3. põimukuul Obinitsan. Kuningriigi päivä peetäs joba 31. kõrda ja seo om täämbädse ao Setomaa kõgõ tähtsämb sündmüs ja kõgõ suurõmb setodõ kokkotulõk.
Kuningriigi pääväl marss Seto sõavägi, mass Seto raha ja valitas veini-, ollõ-, hans’a-, sõira-, leevä-, piiragu- ja näputüümeistre, pillimehe, tandsja ja laulja. Nigu egän kuningriigin, om setodõl kah uma kuning, eeposõ kangõlanõ Peko. Legendi perrä puhkas Peko Petseri liivakooban ja saa ei esi kuningriiki valitsa. Tuuperäst valitsõs setosid timä nimel ülembsootska, kiä valitas maailma kõgõ demokraatlikumba moodu perrä: valitus saa tuu, kink ette tegünes kõgõ pikemb tugõjidõ rivi.
UL
