Kesksuvõ aig. Midägi sünnüs egäl puul. Kongi uut talorahvas liinast küläliidsi. Kongi omma kunstinäütüse vällä säetü. Kongi tetäs tiatrit, kongi mängitäs pilli ja lauldas. Kongi tahtva inemise umma kokakunsti proovilõ panda ja tegevä uma kodokohviku vallalõ. Kongi kõnõlõs kiäki küläjuttu. Tuujaos, et kõik kultuuripääliinaga köüdetü üritüse osaliidsi saanu, pidänü olõma 11 miljonit inemist.
Kongi pandas valitsust kokko ja märgotõdas, kost riigi üllenpidämises rahha mano tulnu, määndsit massõ nõsta ja määndsit tegemiisi veidembäs võtta. Kongi otsustas üts vana miis, et ei kandideeri suurõ riigi presidendis.
Kongi omma inemise, kiä nägevä kõkkõ tuud, miä sünnüs, nigu kavvõmbast. Nimä tahtva lihtsäle mol’ota ja kõgõst taast trallist puhada. Võiolla vahepääl mõnõ raamadu lukõ vai mõtsa ala kikkasiini otsma lonki.
Sääne om taa kesksuvõ aig, ku egäl puul midägi sünnüs.
Rahmani Jan,
Uma Lehe päätoimõndaja
