Mu-vannudsõl korgõmba koolitusõga kodopernaasõl om kõiki naidõ tehniliidsi viguridega küländ rassõ toimõnda. Piässi siski insinöri magistrikraadi mano hankma.
Kergendüses om kuulu perrä, et noorõmbagi inemise vaihõl massinidõga patisaisu jääse. Nä mõistava ei inämb ilma GPS-ildä imä-esä kardohkamaa päälegi sõita. Mõni miis ei jõudvat ilma kepsolda uma naasõ mano sängügi, olõvat essünü noorõ naabrinaasõ mano.
Mõnikõrd jälki ollõv teno kepsolõ tultu maaha mualumbin vai kogoni järve sillen viin.
Et kepso juttu taso ei kõgõ puhta kullana võtta, om hindälegi paari seigelüse perrä tiidä. Ütte juhust olõ õi imehtä. Juhtu tuu kongi Saku kandin. Sääl noid viguriliidsi viaduktõ pidä, külh taiva, külh kraavi poolõ upakilõ. Maainemise kaal rassõst tüüst kangõ, käänitele ei nigu tsirkusõvõimlõjal, et noid sato juhatusõmärke lukõ. Loodat õks korgõ intelligentsusõga GPSi pääle. A tutkit, tuun kottan es kannahta kepsokõnõ kah kõiki noid hööritämiisi vällä ni läts’ ullis. Nakas’ esi nigu tivoli ilmaratas püürlemä.
Ku pildi pääle kaiõ, läts’ hindälgi süä kur’as. Vissi sis kipõlõ uma kodopernaasõ saisu nukka, naksi esi kaardilugõjas. Käänühteli pääd ni loi kipõstõ oppusõsilte. Toimõ ma tulli ja õigõ otsa pääle mi saimi, olku mu mudso tennät. Kuiki kaalavalu hinnaga.
Tõõnõ käkk juhtu tansaman «lõunõmaal», nii et kipõn häpegi om. Sõidimi Vastsõ-Kuustõ laadulõ. Tuu asõmõl, et tutvat tiid pite minnä, saiõ minkagiperäst luulõlidsõmp valitu. Võtimi kepsokõsõ abis, tä laulsõgi ilosahe, lust kullõlda. Nika ku kässe mõtsa vaihõlõ ruusatii pääle käändä.
Ma tsäugahti külh kõvva: olõ-õi õigõ, olõ-õi õigõ. A taadu ühmäs’, et olku mul supileeme kiitmisen kas vai doktorikraat, tan nimmas keps must parõmbihe. Nojah, ma püssügi vakka, nika ku keps kesk ilosat mõtsalaendikku hõisas’: olete saabunud sihtkohta!
Olõ es mõtsmaasikidõ aig kah, et kotus kätte näüdädä. Tuuperäst läts’ ku silmämulku tuu ütlemine, et kah’orõõm om kõiksõ suurõmb rõõm. Ma kõkuti iks tävve ravvaga, nika ku esihindä tarkusõst asfaldi pääl ni õigõn tsihin ollimi.
Tuust pääle om mu kimmäs parool, miä kõlbas pruuki egä kõrd, ku määnegi Hiina tehniga vitin võlss püürüisi nakkas tegemä, et «üle arvõlavva iks ei võta». Päälekauba: olõ ei vaia elektrit ega akusüäme laatmist.
Väljandu Ellen
Koha Lenna tsehkendüs
