27. hainakuul peeti Kangsti küläplatsi pääl perimüspäivä. Ettevõtminõ oll’ osa «Kultuuripääliin Tartu 2024» põhiprogrammist.
Päävä alustusõs sai kullõlda oppust andvit loengit. Folklorist Taali Kati kõnõl’, miä om perimüs ja milles meile taad vaia om. Oja Vilve Vana-Võrumaa käsitüükuast näüdäs’, kuis rahvarõivit õigõlõ sälgä panda ja Visseli Malle andsõ teedüst paigapäälitsist perimüskotussist.
Tüü- ja opitsõõrõn kõnõl’ Soka Erki Võrumaa mõtsaühistüst, kuis egäüts saa vana ao tarkuisi silmän piten luudust ja mõtsa hoita ja kuis sääne targalt toimõndaminõ kõik tõistmuudu tagasi and.
Mõnistõ talurahvamuusõum oll’ vällän vana ao mängumaaga, tekk’ latsilõ põnõvit näputüüoppuisi ja vanaaoliidsi mänguasjuga mängõ. Uma külä poiss Pedäjä Viljar oll’ platsin väiku ääsiga ja näüdäs’ sepätüüd.
Paigapäälidse käsitüümeistri näütsi, midä nä omma tennü, ja opsi tuud huviliidsilõ. Silmä jäi pall’u vahtsõstpruugituid asju. Paigapäälidse talu ja tegijä tutvusti umma kraami.
Kultuuriprogramm alas’ mi uma Krabi külätiatri võrukiilse püstüjalapulliga «#paganamaamann», kost sai selges, ku illus ja tarvilinõ om võru kiil (mõnda asja ei saaki muun keelen üteldä!) ja ku tähtsä omma kasvai Ü-tähe pääl täpi.
Mi perimüspäävä tsiht oll’ näüdädä Vana-Võrumaa kihlkundõ rahvarõivit ja noid sai nätä rahvatandsjidõ ja lauljidõ sällän.
Ja mis om perimüspidu, ku ei kõla lõõdsahelü: lavalõ astsõ lõõdsapille võikimängmise mitmõkõrdnõ võitja nuuriklassin, mi uma küläseldsi nuurliigõ Hordo Kertu. Kavva mahtu viil Teppo lõõdsatalu kokku kutsut Võrumaa lõõtspillimängjä, kedä juhendas Ojasaarõ Toomas.
Suurõ lõkkõtulõ paistõl peeti simmanit rahvamuusigaansambliga Kõhukesed, tandsu vahelõ kullõldi bändimehe Kaha Kaido põnõvit nall’ajuttõ.
Kokku oll’ tulnu väega hulga perimüse ja rahvakultuuri avvustajit, sai maaha peetus üts kimmäs küläpidu. Olõmi tenüligu, et saimi anda väiku osa piirkunna perimüskultuuri näütämises, tähtsüstämises, edesikandmisõs.
Visseli Malle
Kangsti külaplatsi pääle oll’ kokku tulnu väega hulga perimüse ja rahvakultuuri avvustajit, maha sai peetüs üts kimmäs küläpidu. Koobakese Helari pilt
