10. põimukuul tulõ Kaika suvõülikooli matkapäiv, kon matkatas Ihamarust Karilatsi. Ettevõtmist kõrraldasõ võrokeelidse noorõ, ma proovi näile uma kodokandi tutvastegemise man abis olla.

Ihamaru kant om katõ kihlkunna – Põlva ja Kanepi – piiri pääl. Tunnõtuist tegeläisist, kiä tast peri omma, nimma innekõkkõ umaaolist poliitikut Marki Heinrichit ja kiränik Rohu Richardit. Mõlõmbidõ sünnükodo omma ilostõ märgistedü.

Tuust, määne oll’ elo tankandin vanastõ, saa lukõ kiränik Rohu Richardi mälehtüisiraamatust «Vana Võrumaa». Olõ iks lugõnu ja mõtõlnu, määne taa elo tan oll’ aol, ku sõidõti hobõsidõga. Sis oll’ maa inemiisi täüs, no omma poolõ talokotussõ suvila. Põlitsit olõjit om veidü, hulga rahvast om siiä kanti sisse tulnu. A tassakõisi juurdusõ ka nimä. Om nuurt ja päälenakkajat rahvast. Küläl hoitva henge seen paigapäälidse tüüstüse: Paloma Papp ja Cista. Veidükese tegeldäs turismiga ja om mõni väikuettevõtõ.

Küläst lätt läbi Postitii, mille veeren omma Suurõtiimuusõum ja Karilatsi vabaõhumuusõum. Muusõumi kõrraldasõ hulga üritüisi, ütitsit ettevõtmiisi käü Postitii ümbre. Ihamaru külän sünnüs hulga asju kõrda tettü külämajan. Kõrdsihuunõn müvväs pitsat ja om tiatrit tettü. Kõgõ inämb rahvast käü tan Kõivualutsõ laadapäävä aigu. Nii võigi üteldä, et suvõl om tan hulga tegemiisi. Talvõl om elo tsipa rahulikumb.

Suvõl om väega populaarnõ paik Palojärv, kohe viirde käüdäs tsuklõma ja puhkama. Karilatsi poolõ jääs viil Ihamaru luuduskaitsõala, miä om umbõs 250 hektärit. Sääl püsüs vana mõts püstü ja kaitsõ all omma mitmõ kasvo ja tsirkõ ni eläjide elokotussõ. Mõtsaeläjit om tankandin egäsugumaidsi, ma olõ nännü näid hulga, kahru kah.

Tuu, et noorõ omma võtnu plaani tetä matk Ihamarust Karilatsi, om väega hää. Õnnõ jalaga kävven saa periselt nätä, midä tastkandist löüdä või, autoaknõst ei näe õigõlõ midägi.

Inemiisil ei olõki täämbädsel aol aigu süvembäle midägi uuri ja kirändüst otsi. Tuuperäst om vahtsõ paiga tundmaopmisõ man hää, ku paigapääline inemine taast kõnõlõs. Proovi sis Kaika suvõülikooli matkapääväl umma kodokanti tutvusta, nii nigu mõista. Huvilidsõ, tulkõ matkama!

 
Rohu Urmas,
luudusõmiis, timahavadsõ Kaika
suvõülikooli matkapäävä rektri
 
 
 
 
 
 
 
 
 
 
 
 
 
 
 
 
 
 

Kaika suvõülikooli matkapäiv

10.08.2024 Ihamarust Karilatsi

Alostus

10.00 Korjuminõ, teretämine, tutvassaaminõ Ihamaru küläkeskusõ man.
10.00–10.25 alostussõna, rektori kaalaraha üleandmine.

Loeng

10.25–11.00 ettekannõ «Ihamaru ja Karilatsi vanõmbast ja vahtsõmbast aoluust» – Saarõ Hipp.

Matk

11.00–15.00 matk Ihamarust Karilatsi. Matka vidä iist Rohu Urmas. Matka aigu tetäs piätüse Hilba lätte man, Rohu kasvuaian ja Väiku-Palojärve veeren. Matka pikkus umbõs 8 kilomiitret, edimäne jago tuust kõnnitas väikuid tiiratu ja mõtsa piten.
15.00–16.00 lõpumäng Karilatsi muusõumi man, oppas Raju Eliisabet.

Rehkendä!

● Matkapääväle ja är piät saama uma sõiduriistaga. Paigapääl märgimi ütenkuun vällä, kuis osa massinit matka lõpp-punkti saa.
● Osaliidsil piät söögikraam hindäl üten olõma. Karilatsi muusõumi man saa iätüst osta. Kiä taht põh’aligumbalõ Karilatsi muusõumin ümbre kaia, piät muusõumipilõdi ostma.
● Rõiva tulõs panda sälgä ilma perrä. Üten või võtta tsuklõmisrõiva, plaan om matka aigu ka tsuklõman kävvü.

Lisäteedüst saa meiliaadrõsi vorokiil@gmail.com ja kodolehe voroselts.ee päält.