Tuu juhtu 68 aastat tagasi. A kon tuu oll’ ja keä osalidse olli, tulõ peränpoole.

Ma olli suvõs koolist kotun. Mi elli Hürüvä külän ja esä käve hoolega kolhoosin tüül. Esäl oll’ vaia mu vanaimäle vahtsõt lauta ehitä. Tä sai kaubalõ, et ma tii timä iist tüüd, a normipäävä lääva esä nimele. Puul juunit ja juuli olli ma egä päiv hainal, sis tull’ nakada karjan käümä.

Oll’ vast augusti keskpaiku päält lõunet, ku kari sai aetus iinpuul Mustajõe silda ülesjõke hainamaa pääle. Lehmä naksi ädälit süümä. Ma istsõ suurõtii poolõ paiupuhma viirde raamatut lugõma. Lehmi vaihõl käve toonõkurgi, keä napsassi üles hirmutõt kunnõ. Tükk aigu es juhtu medägi, lehmä liiku Varstu poole. Tühjes jäänü platsi pääle nakas’ kogunema kurgi, ja näid oll’ rohkõdõ. Ma es julgu hinnäst liigutagi.

Äkki olli kurõ kogunu tsõõri ja alas’ki näide tands. Noka tsõõri sisse, naksi nä üten nõun tsõõri keskpaiga poole liikma, esi aiõ pää taasperilde vasta sälgä ja plagisti kõvastõ nokki. Sis jälki tagasi, tsõõr suurõmpas, viil kõrd nokiplaginaga keskele kokku. Mitu kõrda tuud tandsu tetti, ma enämp ei mäledä. Pelksi enne, et lehmä nakasõ tagasi käändmä ja tsurkva mu tasulda etendüse ärä.

Sis naksi kurõ minemä säädmä, lintsi egaüts umalõ poolõ.

Ma saie ka ummi kangõs jäänüid kässi-jalgu liiguta, pia olõs raamadu puhma manu unetanu.

Konagi lugesi ma toonõkurgi tandsust, medä keäki oll’ kah päält nännü. Kurgil om pesä pääl moodus tõist kurgõ lindaman nätten kõvaste nokki plagista, kas teretüses vai tiidä andmises, et seo kotus om võetu ja siin om timä peremiis.

Medä näide tands tähend’, tollõlõ ei olõ ma seletüst löüdnü.

Hanimäe Heidi-Hele

Koha Lenna tsehkendüs