Põimukuu perämädsel pääväl peeti Loosu külän lõõdsamuusõumi 10. ja Teppo Augusti lõõdsatalo toimõndamisõ 15. sünnüpäivä. Üles asti lõõdsamängjä Võromaalt ja kavvõmbaltki ja näüdäti vahtsõt lõõdsalugudõ noodikoko.
«Seo aoga om hulga är tettü,» kõnõlõs lõõdsatalo vidäjä ja pillimeistre perrätulõja Teppo Priidu. «Om tettü lõõdsakonvõrentse, näütüisi, om uuritu Teppo originaalpille, om kõrraldõdu lõõdsategemise kursuisi ja kutsutu kokko Võromaa lõõdsamängjide opitarõ, kogokund, miä toimõndas joba säidse aastat ja eläs pia umma ello,» seletäs tä. Kõgõ tähtsämbäs pidä Teppo Priidu, et kõigi noidõ tegemiisiga om härgütet hulga vahtsit inemiisi pilli opma, esieränis nuuri.
Lõõdsapääväl näüdäti vahtsõt lõõtspillipallo noodikoko, kon seen 40 luku. Tuu kogo om kokko säädnü lõõdsamiis Ojasaarõ Toomas ja sääl omma pilliluu är trükitü nii noodikirän ku ka lõõdsamängjide jaos tsipa lihtsämbän kirän.
Lõõdsamuusõumi sünnüpääväpidol asti pillega üles Võromaa lõõdsamängjä ja ansambli Tuulebant.
UL
Lõõdsamängjide kogokund Võromaalt ja kavvõmbastki Ojasaarõ Toomasõ iistvidämisel üles astman. Rahmani Elo pilt
