Ku keväjä mu käest küsti, kas ma saanu tetä Võrol liinaekskursiooni, anni perrä ja olli nõun. Paar päivä inne liina suurt juubõlit saigi tsõõrikäük teos. A selge oll’ ka tuu, et inne, ku tõisilõ kõnõlõma minnä, tulõ hindäl asi selgembäs saia.
Otsõ vällä nii vanõmbit ku vahtsõmbit raamatit ja loi liina aoluu kotsilõ peris hulga. Kõgõ inämb jäivä silmä pildi minevä aastasaa alostusõ Võrost. Ja ku sa nakkat uman mõttõmaailman liina pite kõndma, toes vana jutu ja pildi, sis tuu um väega põnnõv. Olõ esi kah joba üle 60 aasta tsipa tiidligumba pilguga Võro vahel ringi liiknu, a kõkkõ inämb nooruspõlvõst ei mäletä. A ku kae mano vannu asju ja pilte, sis nakkas kujotus parõmbalõ tüüle. Maailma kõiksusõn um 100 aastat imeväiku aig, a Võro liinan um tuu aoga iks väega pall’o muutunu. Hulk vanno armsit puumajju um maaha lahutu vai muud muudu häötedü ja asõmõlõ ehitedü hoobis tõistsugudsõ maja.
Ku läät Katariina alleed müüdä alla, saat mõtõlda, mis sääl kunagi oll’ ja mis nüüd um. Ku jõvvat alla järve viirde ja olõt inne kaenu pilte 1900. aastast, ku Tamula järv oll’ pia täämbädse Kreutzwaldi pargi viirde vällä, mõtlõt, määndse üleujotusõ sis võisõva olla, ku Võhandu jõkõ es olõ viil õgvõndõt ja kanalit kaivõtu. Ja ku kõnnit järveviirt pite, saat mõtõlda, mis sääl oll’ 20, 30 vai 40 aastat tagasi, ja kaia, mis sääl täämbä um.
Ma es saa uma ekskursiooniseltskunnaga pall’o rännädä, a saman sai kokko üte herräga, kel oll’ koton viil tükükene Judeikini rõivapoodist ostõtut kangast. Tuu herr tahtsõ tuud kangatükkü edesi anda Judeikini perrätulõjilõ ja ma sai timäga näide kontakti jagada. Looda, et nä umma ühendüst saanu ja mõlõmba umma õnnõligu: üts sai uma pikält hoitu rõivatükü üle anda ja tõnõ väiku mälestüskilda umma edevanõmbide mosaiiki mano.
Julgusta inemiisi ka järgmäidsil suvvil Võro liina giidis nakkama. Sääne asi tege hinnäst targõmbas ja and võimalusõ tiidmiisi edesi anda noilõ, kiä omma huvitõdu Võro liina aoluust ja tegemiisist. Niimuudu saami inämb arvo kõgõst taast suurõst ilost, miä meil tan paigapääl olõman um.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
