Kõgõ põnõvamba jutu ja juhtumisõ tulõva iks elost hindäst ja eloh iks juhtus ütte ja tõist. Minevaasta, nigu timahavagi, oll’ väega hää seeneaasta. Hindäl seene tettü ja mõtli, et kül jäi mõtsa pall’o perrä. Nuu mõtsa ülejäägi ommava ku hambavalu, kõik aig kripatas, et raha videles maah. Nigu kiäki purõs.
Ku saak jälki käeh, tulõ minnä bussijaama, kohe käü kokkoostumassin. Tõnõkõrd saa massinat uuta puul tunni, mõnikõrd inämp, a mul om uma seldsiline kõik aig üteh: tsillokõnõ pinipoiss Ruudi.
Ruudilõ miildüs Vilustõ bussijaam väega, selle et seo om kotus, koh tä käü läbi tõisi pinnega. Esierälidse lõhna, kistumalda suurõ pini, kassi.
Istsõmi Ruudiga bussijaamah, oodimi kokkoostuautot. Tuukõrd tull’ meile seldsilidses vana talopernaanõ Marta, kiä umast mõtsast läbi kävven õga päiv uma paar kilo kikkasiini üles korjas. Kuna timä kah muud es mõista siiniga pääle naata, säädse sammu kokkoostu.
Tutvusõ nakatusõs naas’ mu neläkilonõ Ruudi kõvva haukma ja Marta kukku kitmä: «Sa kae, koh om tubli pini! Niipall’o häste hauk! Ma piät hindäle kah iks väiku pini võtma. Mu suur es haugu sukugi, a noh, timä kuuli õnnõs ruttu är kah. Vist sai kolm aastat ellä. Ma tahtsõ tedä haukma opata. Panni kuudi kõrvalõ käpile ja hauksõ värehti poolõ. Pini es tii vällägi. Läts’ kuuti tagasi. Ma hauksõ iks edesi. Sõs tull’ värehtist naabrimiis aida ja küsse, mis ma tii. Ütli, et anna pinile oppust, kuis hauku. Naabrimiis ütel’, et ma olõ ull’ ja mink peräst piät pini haukma, ku kedägi ei olõ. Pini ei saa jo arvo, midä timäst tahetas. Naabrimiis ütel’, et lätt nüüd vahtsõst värehtist vällä ja tulõ tagasi, et haukkõ ma sõs pinile ette. Nii, tull’gi naabrimiis värehtist jälki sisse. Olõs võinu jo niisamagi timä pääle hauku, illos miis tä joht ei olõ, a nüüd oll’ tä uma kuhti võlssipite sälgä pandnu ja hiussõ pulsti ajanu, lõrisi ja jorisi mano. Ma naksi sõs haukma nii kõvva, ku ma jõudsõ. Kurk läts’ halusas, a mu pini es tii iks määnestki hellü. Naabrimiis rehmäs’ kah käega ja läts’ minemä. Ütel’ viil, et ulli mõlõmpa. Es nakka mu pini haukma.»
Vot säändsit lugusit või mi mail kuulda!
Liini Enel
Reimanni Hildegardi tsehkendüs
