Targõmba ütlivä sinnä manu viil: vai vahetas liikva vasta. Tuu tundmalda tsaariaigsõ hambamehe vällämõtõld nali oll’ nii makus, et mõni nakas’ki uskma: võlss kül, a mõtlõ ku illus.
Vahepääl om Tamulast hulk vett vällä joosnu, reklaami jõud om tohutult nõsnu, a kiäki ei olõ pruuvnu tuud asja lõpuni selges kõnõlda. Ma sis proovi. Seo ilma aigu om moodun küssü: mis saa edesi, kohes sorteeritü prügü lõpus jõud? Noh, liikvaga ei olõ murõt, tuu auras är, ku midägi muud ei juhtu. A kohes saie nuu vana lundi? Lambanahast, nigu stiil nõud’, et lääsi kasukaga kokku. Mu mõistus muud vällä ei mõtlõ: noist keedeti suppi.
Kaemalda ammõtlikkõ juttõ pääle, võit kimmäle üldä, et tsaariaigu hoiõti pall’u inämb kokku ku täämbä. Materjali ja asju, ka inemise hoiti umavahel parõmbalõ kokku. Ku lunte manu tagasi tulla, võit üldä, et lunten oll’ olõman joba parasjagu suula (edevanõmbiide higi!) ku ka suur jagu Mendelejevi tabõlit. Taivas tiid, pall’u noid supisüüjiid oll’, a nimä omma vahepääl jõudsalõ paljunõnu.
Kuigimuudu määndsegi geeniviguri kaudu om lundisupi maik jõudnu näist mitu põlvkunda edesi. Kost muidu võetas jutt: «Ma lambaliha ei süü, tuul om kasukamaik man.» Meil või säänest rahvast olla üle poolõ, kiä kõnõlõs kasukamaigust. Sääl om õnnõ väiku essätüs: tuu om lundimaik. Ma ei tiiä üttegi peret, kon nällä aigu olõs kasuk är süüdü. Küll om kõnõldu saapataldust, a noil ei olõ köüdüst lambiidega.
Ku nüüd asja kaia tiidüslikult, sis om jo tõestamalda, kas lundi (vai kasuka?) maik tull’ lambast vai edevanõmbiide higist. Perämine oll’ ka kahtlõmalda üts kimmäs umaaignõ toidulisand.
Müüte vasta võidõlus om ülepää rassõ asi. Ma tunnõ, et kasukamaitsõ müüdi pooldaja nakkasõ mullõ pall’u inämb miildümä, ku nä võtva umas, et innevanastõ om näide perren nällä aigu keedetü lundisuppi. Õnnõ nii oll’ tan põhjamaal võimalik ellu jäiä, kaskalda isik külmäs’ nigunii är.
Kokkuvõttõs: a) ütski apteek ilmselt vannu lunte ei osta ega vaheta liikva vasta; b) tiidläse ei olõ kasukamaidsõt uurnu ega timä olõmanolu kimmäs tennü; c) lahjal lambalihal kül määnestki kasukamaitsõt ei olõ; d) ku mõnõlõ miildüs lambapekk, tasus uuri, kas mõni timä edevanõmb es olõ mongol. Kõva mehe nuuki.
Pulga Jaan
