19. rehekuu pääväl peeti Võrol Kreutzwaldi kooli kokkotulõkit. Üts ettevõtminõ oll’ tuul pääväl väiku spordivõistlus, kon korvpalliplatsi pääl saiva kokko kooli vilistläse ja oppaja. Mäng lõppi oppajidõ suurõ võidu ja osaliidsi rõõmsa meelega.
Kõgõpäält tulõ minnä aolukku. 1990. aastidõ alostusõn oll’ tuukõrdsõn Võro I keskkoolin korvpallivõistkund nimega Logos Ambales. Mängi nä väega es mõista, a ummõhtõgi kirotõdi tuust võistkunnast kõrra ka aolehen. Asi tollõn, et võistkunnal oll’ kimmäs mänedžer – Valpri Valdo. Ma olli võistkunna triinjä.
Luix käve mõttõ vällä
Seo suvi kirot’ mullõ kujondaja Luiga Kristjan, et mis olnu, ku pidänü kooli kokkotulõkil maaha korvpallimängu, kon Logos Ambales mäng oppajidõ vasta. Et tennü kõigilõ korvpallihammõ ja tulõtanu vanno aigõ miilde. Saadi mõttõ osaliidsilõ edesi. A es tulõ üttegi vastust, oll’ suvi ja inneskidse kõva korvpallimängjä es paistu mõttõga kuigi üten tulõvat. Nika ku…
Mängu tull’ mänedžer
Suvõ lõpu poolõ haard’ uh’a hindä kätte Logos Ambalese mänedžer. Tä naas’ kirjuga oppajit ja mängjit pommitama. A õks es määnestki hõiskamist, et teemi är. Innembä kõnõldi umist vigahuisist ja tuust, et taa kuul ei olõ iks inämb taa kuul. A mänedžer es jätä perrä ja trehväs’ lõpus iks õigidõ inemiisi otsa.
Karu sai as’ast arvo
Üts noist õigist inemiisist oll’ koolidirektri Karu Taavi. Timäga es olõ mänedžeril pikkä seletämist, hoobis lahenduisi tull’ ussõst ja aknõst. Mäng tulõ. Vanan spordikoolin. Ja võinu tetä nii, et oppaja saava kah vähembält üte korvi sisse visada. Tsipa mõtlõmist oll’ tollõ kotussõ pääl, kiä nuu mängjä omma, kas Logos Ambales iks kokko saa. Tuuperäst otsustõdi, et umavaihõl nakkasõ mängmä oppaja ja vilistläse.
Ku kokkotulõgi kava vällä kuulutõdi, oll’ korvpallimäng sääl seen. Inämb midägi är jättä es olõ võimalik.
Ärimehe panni ola ala
A kost mängjit võtta? Perämädsen hädän kõlist’ mänedžer prilliärimiis Lauri Brunolõ. Vastus oll’ lühkü: ku pall’o mängjit vaia om?
Bruno kõrrald’ korvpalli mängi mõistvit inemiisi nii oppajidõ ku vilistläisi poolõ pääle. Nii oll’gi puul tunni inne mängu alostust vana spordikooli rõivaruum nal’aliidsi tegeläisi täüs. Ka saalin oll’ mitund sorti kõrraldajit ja kohtumiihi, nii et mäng võisõ pia pääle naada.
Hallõ päähäsaaminõ
Mängust hindäst suurt kõnõlda ei olõki. Mõlõmban võistkunnan oll’ vast kümme mängjät, mängiti 4 x 5 minotit ja tuu ao seen saiva ka kõgõ sandimba platsi pääle. Korvi poolõ visati palli hulga, a sisse läts’ tuu harva. Oppajidõ poolõ pääl olli tsipa kõvõmba mängjä. Lõpusais jäigi sääne, et vilistläse saiva peris hallõlt päähä – 14 : 31.
Prohvi saalin
A üte perisprohvi saalin siski olli: härgütüstütrigu tandsutrupist Showstep. Näide tandsu kaeminõ avit’ vilistläisil kaotusõhallu vällä kannahta. Ja mänedžer Valpri Valdolõ miildü nii väega, et tä juusksõ tandsvidõ tütrige mano ja tegi näide perrä paar kinnä tandsusammu kah.
Rahmani Jan
Kõva korvpallimängjä ja koolidirektri omma päält mängu hinnäst üles rivistänü: vilistläse valgidõ ja oppaja kõllatsidõ hammidõga. Lauri Karoliine pilt
Korvpallikokkosaamisõ kõgõ prohvimba ülesastja, härgütüstütrigu trupist Showstep. Lauri Karoliine pilt
