10 aasta iist tunnistõdi Vana-Võromaa savvusannakombõ UNESCO üleilma tähtsä kultuuriperändüse esindüsnimekirä väärilidses. Sääne välästpuult tunnustus avitas kombit alalõ hoita ja kasvatas tiidmist, et tego om tähtsä as’aga, omma savvusannategemiisi iistvidäjä seo aoga tähele pandnu.
Veeroja Eda ja Eichenbaumi Külli omma olnu päämidse iistvidäjä, teno kinkalõ savvusannaga köüdetüid tegemiisi om nii tähtsäle tähele pant. Perämädse kümne aasta pääle tagasi kaiõn löüdvä mõlõmba, et savvusannahuviliidsi om mano tulnu. Niisama omma inemise naanu sannan käümist ja sannakombit tõsitsõmpa võtma.
«Muutunu om inemiisi tiidmine tuust, määne sannan käümine om. Ku mi alostimi uman talon sanna jagamist inemiisiga, sis õks ollõpudõli kolisi ja sannan käve kõva jutustaminõ. A nüüd inemise tulõva ja nä tiidvä joba, et sann om rahu, vaikusõ ja hindäga olõmisõ kotus. Ja et sannast võit tervüsele ja hindä olõmisõlõ tukõ saia. Jah, sann om läbikäümise kotus kah: suuri pühhi aigu õks saias kokko perre ja naabridõga, kõnõldas, naardas ja tõnõkõrd esiki tandsitas sanna iin. A tähtsä om iks tuu, et sann om hengepide, rahu löüdmise kotus,» kõnõlõs Veeroja Eda.
Huvi nõsõmist sannakombidõ vasta om tähele pandnu ka Eichenbaumi Külli. «Ku sõita Võromaal ümbre, om nätä, et peris pall’o om kas vahtsit sannu vai om mõni vana sannakõnõ är kõpitsõt. Ei tiiä, kas ilma UNESCOlda, ilma sannast kõnõlõmada olõssi tuu nii virgalt lännü. Kõgõ tähtsämb om, et kombõ, tiidmise ja mõistminõ püsünü ja lännü nuurilõ edesi, ja toda või kül üteldä, et tuu om juhtunu,» löüd tä.
Tulõva aasta om plaanin savvusanna kokko lukõ
Sannategemiisi iistvidäjil om plaanin tsipa täpsempä uuri, ku pall’o om savvusannu iks kõgõ Eesti pääl alalõ ja ku häste omma alalõ püsünü sannakombõ. Tuujaos om kokko säet väiku vastamisleht, midä savvusanna umanik vai teedüsse korjaja saa elektroonilidsõlt vai paprõ pääl täütä. Savvusannu ülelugõminõ ja kombidõ kirjapandminõ lätt vallalõ tulõva aasta mahlakuun.
Mitmõsugumast teedüst savvusannu ja tuuga köüdetüide kombidõ kotsilõ om kokko kor’at kodolehe savvusann.ee pääle.
Rahmani Jan
Savvusannategemiisi päämidse iistvidäjä Veeroja Eda ja Eichenbaumi Külli. Rahmani Jani pilt
