Põlva Lõunakaarõ latsiaia Mesimummu majan peeti märdikuu edimädsel täüsnädälil võro keele nädälit.

Latsiaian oll’ mitmõsugutsit tegemiisi: latsipilte ütisnäütüs «Kodoeläjä’», esäpäiv, latsiaia sünnüpäävä ja märdipäävä tähüstämine. Suurõmba latsõ ja oppaja käve märdisandin, lauli ja kõnõli võro keelen.

Oppaja Lea ja Inge käve suuri latsi rühmin unõjutukõisi lugõman. Latsiaia nädäli söögikaardi päält sai lukõ, kuis kuuldus menüü hoobis võro keelen.

Mesimummu sünnüpääväl rõõmusti tüüperet võrokeelitside juttõ ja lustligu pillimänguga Kaha Kaido ja Ojasaarõ Toomas. Keelepesärühmän käve külälise Võro instituudist – Haugi Evely ja Jüvä Sullõv. Evely meisterd’ kuun latsiga paprõst tsirgukõsõ ni näüdäs’ Laanõ Triinu raamatut «Keelepesätsirgu jutu’». Egä lats sai hindäle raamadu ja egä latsiaiarühm kingitüses vahtsõ võrokeelidse Tähekese.

Sullõv jutust’ muinasjutu kolmõst põrsakõsõst ja mänge latsilõ pillilukõ kitra ja kandlõga.

Kävemi latsiga viil Põlva keskraamadukogon. Raamadukogotädi jutusti ja loiva meile võrokeelitsit raamatit ja luulõtusõ märdikuust, mängemi pildi- ja sõnamängo.

Esäpäiv oll’ kah väega põnnõv. Esä mängevä latsilõ kakukõsõ muinasjuttu ja oll’ esäsid, kiä kõnõli lavastusõn võro keelen. Ka latsi imä olli väega tubli ja loiva nädäli joosul latsilõ unõjutukõisi.

Tennämi kõiki, kiä võro keele nädäli tegemiisin üten leivä ja soovimi hääd võro keele pruukmist!

Hallapi Lea ja Paabu Piret,
Rukkililli rühmä keelepesäoppaja

Märdipäävä tähüstämine Mesimummu võro keele nädälil.