2024. aastak om olnu Võromaa keskraamadukogolõ tähtsä ja põnnõv, selle et aasta sisse jääs koliminõ ja sissesäädmine uman vanan, a vahtsõs tettün koton. Ja põnnõv tulõ ka vahtsõnõ aasta, miä om vällä hõigat ku eesti raamadu aastak. Sääne teema-aasta om raamadukogoga egäl juhul tihtsän köüdüssen.
«Lugõjalõ väega miildüs,» ütles Võromaa keskraamadukogo teenindüsosakunna juhataja Küti Tuuli, ku lugõmissaalin ümbre kaes. Muidoki tund sisseastja õkva, et om lämmän, häste valgõn ja õhurikkan ruumin, a pääle tuu löüd raamadukogost no muid mugavuisi. Näütüses saa pruuki vaikusõtarrõ, mink saina omma helükimmä – tõnõkõrd om vaia kotust, kon midägi välästpuult es segänü. Viil saa lugõja hinnäst istma säädi mürrä kinni pidävähe kabiintuuli. «Nukakõisi, kon inämb umaette olla, om mano tulnu,» võtt Küti Tuuli sisekujondusõ muutusõ kokko. Pääle suurõ teenindüssaali om siseruumi ümbre säetü viil latsiraamatidõ osakunnan: näütüses om sääl nüüd eräle nuuriala.
Raamadukogo om innekõkkõ raamatuga kokkosaamisõ kotus, a nüüt om tettü parõmbas ka ligipäsemine vannulõ vinüülplaatõlõ, midä om kogon kah umajago. «Valik om peris kirriv, huvilidsõ omma oodõdu plaatõ lainama,» kuts Küti Tuuli muusigasõpru kah läbi astma. Et näütüsepinda om kah inämb ku inne remonti, sis om pääle kullõmisõ kõik aig iks midägi kaia kah. Parhilla om välän imä-tütre Langa Lea ja Merikese kudamistöie näütüs «Tii toda, midä mõista». Ja jõulukuu om vällä meelütänü viil väiku jõulukaartõ välläpanõgi.
Eesti raamadu aasta meeleolo om raamadukogon kah joba hõl’oman. Näütüses saa kaia rändnäütüst «Eesti raamat 500», miä teema-aasta säsü mano juhatas. Võromaa keskraamadukogo om umalt puult säädnü kõrvalõ virtuaalnäütüse uma kogo pärliist – kõgõ vanõmbist raamatist. Kõgõ vanõmb eestikiilne raamat om seon kogon 1739. aastal vällä ant piibli.
Muidoki peetäs raamaduaastal Võro raamadukogon meelen eesti kiränige tsõõrikit sünnüpäivi ja sünnüaastapäivi. Näütüisist soovitas Küti Tuuli kimmäle kaema tulla Eesti aoluumuusõumi välläpanõkit «Gorikatuur», miä näütäs tunnõdu nall’apilte tegijä Agori Vello ehk Gori luudut ja jõud Võrolõ joba aasta alostusõn. Vallalõ tetäs eesti raamadu aasta Võrol nigu muialgi 30. vahtsõaastakuul: kell 17 mäng Nulltiatri raamadukogo mõttõtarõn Võro juuriga Kudu Kalõvi lavastust «Endspiel», miä kõnõlõs Visnapuu Henriku viimätsist päivist New Yorgin.
Kimmäle mass tulõva aasta tihtsäle raamadukogo kodolehe pääl kävvü, selle et raamaduaasta kava saa kõik aig tävvendüst. Nii kooni 2026. aasta imäkeelepääväni, ku raamaduaasta pidolidsõlt lõpõtadas.
Kabuna Kaile
Võromaa keskraamadukogo latsiosakunna juhataja Solli Kristi ja teenindüsosakunna juhataja Küti Tuuli lugõmissaalin vaikusõtarõ man. Kabuna Kaile pilt
Raamaduaasta 2025
• Edimädse eestikiilse raamadu ilmumisõst saa tulõva aasta 500 aastat.
• Raamaduaasta patroon om president Karisõ Alar.
• Raamaduaasta juhtmõtõ om «Rahvas nakkas pääle raamatust» (Runneli Hando).
