27. märdikuul Õismäe pääväkeskusõn olnu väega lämmi kontsõrt oll’ pühendet võro keelele.
Är sai märgitüs ka hingiaig lauluga «Sa süämen no panõ». Sõs kõnõl’ kava juht Müürsepä Külli võrokõisi seldsi tegemiisist ja ansamblist Liiso, kes om 28 aastakka kuun käünü – edimädse laulja omma jo noorõmbidõga vaihtunu.
Süäme tekk’ lämmäs võro kiilde säetü laulmisõ kullõminõ. Inämbüsel lauljist om viil kõrvun vanaimäde kõnnõhelü. Rahvarõiva anni uma osa pidolidsõ olõmisõ saamisõs ja kõik kava oll’ Küllil, kiä kõnõl’ laulõ ette ja pand’ nä rahva jaos eesti kiilde ümbre, ütidse torrõ luguluu sisse põimit. Tä tekk’ selges, kiä om sõna ja viie tennü ja andsõ rohkõt teedüst as’ast ja tuust aost. Seo andsõ lauljilõ hüvvä vunki ja kullõjilõ tiidmist, kuimuudu kõrvu teritä.
Nii saiva kõik laulu armsahe ette kantus. Oll’ kinä nätä, et mi seldsi president, jõvvulinõ iistvidäjä ja takasttoukaja, vaimnõ imä Külli esi kah laulsõ. Oll’ nätä, et juhi ruul om kimmäle timä käen: tä hoitsõ tempot ja Liisokõisi kombõkat üllenpidämist.
Naasõ olliva üte kivve vidävä Haani mehe, Soka Olõvi kah üten võtnu. Tä laulsõ väega kinäste ja murumüts oll’ pään. Ummamuudu nä ütstõõsõ ala ütlivä üts üten, tõõnõ tõõsõn viien, kokko tull’ ku hõikminõ mõtsa veeren. Saalitäüs inemiisi ilostõ kullõman. Nuu, kiä saalin kulssi, õnnõ plaksuti, kõigilõ miildü väega. Meelemõnuga oll’ ette kantu ansambli nimilaul «Keträ, Liiso!». Näimi lauljidõ perrä, kuis edimält kõik kondi olliva Liisol haigõ, es taha kedrädä inne, ku esä lubasi Tarto liinast noorõ mehe tuvva – vot sis naksiva lauljidõ jala tandsma, es olõ inämb haigõ.
Üte marsilaulu manu haardsõ ansambli oppaja Katrin trummi ni klavõri manu hüpäs’ üts tanuga laulja Maie. Hüvä huug oll’ sehen ja saali rahval nägo naarul.
Sõs muidoki sai kuulda armsit Võromaa kitmise laulõ: Kirberi Koidu «Sa olõt illos, Võromaa» ja Eksta Viivi võro kiilde pantu «Võhandu kaldal». Kats kõrda sai laultus Kõiva Inda «Mu latsõpõlvõ Võrumaad», mis om üts väega illos laul ja võrokõisi hümnis saanu.
Es päse kullõja kah laulmalda. Meile jaeti katõ laulu sõna ja tetti üts ütislaulminõ: Liiso võru, rahvas eesti keelen. Egäüts laulsõ ummamuudu, a kokko tull’ nii, nigu olõs üts – süäme olliva üten!
Säändsit laulmiisi piäs sakõmbahõ kullõlda saama. Võro kiil om tõtõstõ tõõnõ kiräkiil Eestin ja Võro om tõõnõ pääliin. Kül om hää, et juurõ omma Liivimaa mullan.
Heng läts’ nii härdäs, et vesi oll’ silmin. Tugõvat tervüst ja pikka ikä seltsile, ti ajati õigõt asja!
Einasto Rein, Kolditsa Maie
Pildi pääl: klavõril (säläga) oppaja Keerma Katrin, laulja Müürsepä Külli, Traksi Lia, Kolditsa Maie, Ristikivi Siiri, Urbaniku Eha, Toomla Silvi, Vaggo Aime, Annusveri Karin, Soka Ollõv. Einasto Reinu oilt
