Võro liinal om vidänü, et tan om kirriv kunstielo, löüd Vana-Võromaa kultuurikua galõrist Huulõ Jana. Minevä riidi tetti kultuurikuan vallalõ kats näütüst: Ruusa Ago fotovälläpanõk Arktikast ja Villändi kultuuriakadeemiä perändtehnoloogia osakunna käsitüükunsti näütüs «Ajajõgi».
«Väega kiriväle om näütüisiaasta käümä lännü, nigu nätä. Ku meil om muido aastalõ plaanit säidse näütüst, sis timahava tulõ katõssa: parhilla om kõrraga kats näütüst üllen,» kõnõlõs Huulõ Jana.
Ruusa Ago pildi omma üles võedu 1977. aasta suvõl Arktikan, ku filmimiis üten Meri Lennarti ja Rahomägi Sergoga sääl filmivõttil käve. Ku Ago om mi kandin inämb tunnõt paigapäälidse fotoaoluu uurja ja vanno pilte välläotsja, sis no saa nätä timä hindä noorõnpõlvõn esierälidsest paigast tettüid pilte.
Villändi kultuuriakadeemiä perändtehnoloogia välläpanõk näütäs vanno kombidõ tarvitamist täämbädsel aol. Näütüsele om ummi töid tennü 16 meistrit-kunstnikku. Näütüse kujondust kand sümbolina aojõgi, miä nigu juusknu läbi perändikihte ja esimuudu käsitüükombidõ. «Om ammu teedä tõtõ, et kagueestläisile miildüse käsitüü- ja tekstiilinäütüse. Aasta iist oll’ meil väega popp Läti käsitüü näütüs, seokõrd astusõ sis üles Villändi kultuuriakadeemiäga köüdedü meistre,» kõnõlõs galõrist.
Aasta näütüisikavan om Vana-Võromaa kultuurikua galõriin viil hulga esimuudu asjo. «Säe plaani võimaligult esisugumast kunsti: käsitüüd, maali, täämbädse ao installatsiooni, skulptuuri,» seletäs Huulõ Jana galõristitüüd. Nii saa pääle tuud, ku parhilladsõ näütüse maaha võetas, nätä noorõ kunstnigu Luigõ Johannõsõ skulptuurõ.
Lehekuun om plaanin üles säädi Kuusingu Toomasõ maalõ ja graafika näütüs. Päält Kuusingut tulõva suvõl saali ja Katariina alle pääle Mäetammõ Marko maali. «Mäetammõ loomingu mano minekis om vaia musta huumori suunt ja julgõt kaemist, tuu om hariligust tsipa intrigiirvämb,» hoiatas näütüisi kõrraldaja.
Põimukuu lõpun om plaanin näüdädä jäl käsitüüd, seokõrd Mehhiko umma. Päält tuud saa nätä näütüst Lutjuki Mara maalõst. Aasta lõpõtas plaani perrä Ohaka Valduri 100. sünnüaastapääväle pühendet maalinäütüs, kohe kor’atas eräkogodõst kokko kunstnigu innekõkkõ Kütioroga köüdedü tüü.
Kokkovõtvalõ ütles Huulõ Jana, et Võro liinan käü kõva kunstielo. «Mi olõmi õnnõlik liin uma katõ kunstigaleriiga. Om küländ pall’o näütüisi vallategemiisi, om väkev ateljeepesä ATE. Ja vapra Jõgi-Rumvoldi Ruti, kiä kunstipuuti pidä – tuu om tävveste fenomen, et tä om kõik neo aasta vasta pidänü. Ja viil kunstikuul kah. Nii et kunstielo om väiku liina kotsilõ väega kõrralik.»
Rahmani Jan
Vana-Võromaa kultuurikua galõrist Huulõ Jana kesk «Aojõõ» käsitüünäütüst. Rahmani Jani pilt
