15. radokuul tetti Rõugõ rahvamajan vallalõ tekstiilikunstnik Solmanni Janika näütüs «Loodushing». Näütüsel omma välän palajaraami pääle säedü kangatükü, kohe pääle omma kuivatõduisi puulehti, egäsugumaidsi kasvõ ja siini abiga trükitü luudusõvärvega pildi.
Solmanni Janika om kasvõga trüknü joba päält kümne aasta, tego om timä kolmanda näütüsega. Päält näütüse vallalõtegemist saiva huvilidsõ võtta ossa Janika kasvotrükü tüütarõst. Säändsist tüütarrist om aastidõ joosul läbi käünü päält 500 inemise.
Rõugõn tarvitõdi trükmises minevä suvi kor’atuid kuivatuid kasvõ. Päält noidõ sai pruuki pruuni värvi jätvit siini ja sibulakuuri, minkast oll’ võimalik esimuudu kujjõ vällä lõigada. Trükiti nii paprõ ku rõivatükü pääle.
Rahmani Elo
Tüütarõ vidäjä Solmanni Janika võtt papõrd trüküvannist vällä. Rahmani Elo jutt ja pilt
