Kokko om säet näütüs tuust, kuis esi piirkundõ noorõ omma jõudnu umakultuuri mano. Näütüse nimi om «Noorõ’ ja juurõ’» ja taad näüdätäs esi paigun. Võromaal om näütüs parhilla üllen Võro Kreutzwaldi koolin, 17. mahlakuust lätt näütüs edesi Põlva kuuli. Plaanin om, et näütüs nakkas haridus- ja kultuuriasotuisi pite ümbre käümä.

A minka täpsempä tego om? Üts näütüse kokkosäädjä, nuur võrokõnõ Saarõ Hipp seletäs lähkümpä vallalõ: «Taa om 2024. aasta Euruupa kultuuripääliinu Tartu ja Bodø ütidse projekti «Rising Young Ambassadors» raamin kokko pant näütüs. Projektin saiva kokko saami, seto, võro ja mulgi noorõ, kiä omma ummi kultuurõ manu jõudnu, olkõgi, et näide kiil vai kombõ laemban plaanin häömän ommava. Ütitselt opiti ütstõsõ kultuurõ tundma ja saadi sõbras, a nuu näüdüsse, kuis kiäki om uma kultuuri manu jõudnu, kost midä opnu ja mille tuud tähtsäs pidä, pannimi ütenkuun näütüste. Et olõs vällä tuudu tegemise, mis naid nuuri omma ummi juuri löüdmisel avitanu, ja saanu noid tõisiga võrrõlda. Näütüses om kõigil määnestki muudu võimalik umma kiilt koolin oppi, a saamõl tulõ tuu õigus säädüsest, võrokõisi kuulõl om tuu võimalus vabatahtlik. Pall’o omma käünü kultuurikoolin vai võtnu ossa mõnõst kultuuriüritüsest, mõni om uma kultuuri kottalõ esi raamatust lugõnu vai hoobis saanu esi iistkõnõlõja rolli. Kõik säändse hää näüdüsse pannimi tahvlidõ pääle, et noorõ saasi esi nätä ummi võimaluisi vai saia vahtsiid mõttiid.»

UL

Näütüs «Noorõ’ ja juurõ’». Rahmani Elo pilt