Märtsikuu viimätses puulpääväs olli Mõnistõ rahvamaja soliidsõmban iän laulja ja tandsja, kiä kandva ütist nimme Mehkari, kutsut küllä Voorõmaalõ Kaarepere rahvamajja. Sääl oll’ vanõmba rahva pidu ja Mõnistõ rahvast peeti meelen tuuperäst, et Kaarepere lauluansamblit, Palamusõ rahvamaja tandsurühmä Paunvere Mamslid ja Voorõmaal viil mitmaid lauljõid-tandsjaid juhatav Aunapi Artur om Mehkamaa rahva hää tutva tuust saadik, ku tä sügüselt Mehkariide pidul akordioni mänge, kõik laulma ja tandsma pand’ ja pidu armõdu hää huuga käümä tõmmas’.

Artur on kolmõkümne ligi nuur miis, kiä latsõst pääle mitmaid pille om mänginü ja kiä alasi nuuri kõrval ka vanõmbõide inemiisiga häste läbi om saanu ja nõun om nuuri tandsurühmi kõrval ka naide laulu ja tandsu juhendama.

Pidu Kaarepere rahvamaja söögilaudu takan oll’ illus ja rõõmus. Esini Kaarepere laulja ja tandsja ja Paunvere Mamsli. Muiduki tandsõ ja lauli ka Mehkari. Palamusõlt oll’ piduliisile tandsus mängmä tullu kapell Nukitsamehe Naised, aga säälgi tull’ akordionimiist ja juhatajat asõnda Arturil, kedä pedi seol pidul vääga mitmalõ poolõ jaguma.

Mehkamaa rahvas tennäs Kaarepere külälislahkõt rahvast, kedä vedä iist rahvamaja loovjuht Kaevali Helgi.

Hüväste jätten lubati, et järgmine kõrd saias kokku Mehkamaal.

Nõlvaku Kaie