Neläpäävä, 17. mahlakuul näüdäs’ kiränik Rõõmu Grethe Rõugõn umma vahtsõt fantaasiaraamatut «Viimane»
Raamadunäütämist avit’ kõrralda Peetsalu Erkki, kiä autori juttu küsümüisiga juhtsõ.
«Taa om lugu Jumist ja Kippenist, nuurist, kink unistusõst löüdä üles suuvõ täütvä lohe saa pööräline seigelüs elo ja surma pääle,» seletäs kiränik. Raamaduilman eläse inemiisiga kõrvuisi mi folkloorist tutva pininuki, essütäjä, viimao ja muu tegeläse. «Mõnõ omma hõela, mõnõ saladsõ, mõnõ tsipa hää kah. Tegemise käävä aol, ku Rõugõn om kants, seokandi rahvast valitsõs kuning ja kõgõl, miä jääs kandsist välläpoolõ, hoitva silmä pääl haldja,» ütles Rõõmu Grethe.
Kiränigu sõnno perrä tull’ mõtõ sääne raamat kirota sis, ku tä naas’ märgotama, kuis om saanu alostusõ timä eelmädse romaani «Kaarnapuu» lugu. «Nii om seo üttepite lugu tuust, miä oll’ inne «Kaarnapuu» tegemiisi, a tõsõst külest om taa umaette sar’a edimäne raamat, selle et lugu kasvat’ kirja pandõn hindä ümbre terve maailma, minkal ma ei ihna viil minnä laskõ,» seletäs kiränik.
UL
Peetsalu Erkki ja Rõõmu Grethe. Rahmani Jani pilt
