1. lehekuu pääväl mängsevä Võro maakunna maatiatri Lasva rahvamajan maaha kümme tiatritükkü. Pikk päiv andsõ hää ülekaehusõ, miä sünnüs mi kandi rahvatiatri-ilman. Panõ siiä kirja mõnõ mõttõ, miä tiatripääväl päähä tulli.
Sainast saina näütemängu. Kümne näütemängu hulgan olli ülekaalun kergembä tükü, kon prooviti nall’a tetä. A silmä jäi tõsitsõmpi tükke kah, kon sai nätä inemiisi umavahelist läbikäümist ja salahuisi. Nal’atükke ja jantõ tahetas iks tetä ja tuu om hää, a tegijä pidänü silmän pidämä, et komöödiä om väega rassõ þanr ja nõud tõsist tüüd. Inämbüs ülesastjit olliki asja tõsitsõlõ võtnu, miä näütäs, et tego om tõsitsidõ tiatrihuviliidsiga.
Suurõmb vaivanägemine tasus hinnäst är. Tiatri man omma päält teksti tähtsä viil kujondus, liikminõ ja kõik muu sääne, miä kaeja hinnäst är unõhtama ja tiatritükkü sisse elämä pand. Nii nõssivagi tiatripääväl mu jaos tõisist korõmbalõ tükü, kon lavastaja ja trupp olli liikmisõ ja kujondusõga inämb vaiva nännü.
Umakeelitside tükke puudus. Kümnest mängitüst tüküst oll’ õnnõ üts tükk võro keelen ja üts seto keelen. Sääne om mi maatiatridõ parhillanõ sais ja tuu tege tsipa murõht. Ummõhtõ oll’ mitmõ tükü man tunda, et mängvä inemise, kiä uman egäpäävätsen elon tarvitasõ iks umma kiilt. Mi kandin ei olõ midägi loomulikumbat, ku tetä maatiatrit uman keelen ja vast iks püürd parhillanõ moodulainõtus tulõvil aastil uma keele mano tagasi. Ja vast võtva uman keelen kirotaja kah hinnäst kokko.
Hää tiatritükü salahus. Kiviräha Andrusõ üts tegeläne om lühküle valla seletänü, määne om hää tiatritükk: «Saa ikkõ ja naarda!» Niisama lihtsä asi omgi ja toda kinnitäse ka iku- ja naarunäoga tiatrimaski. Sääne väiku tarkus võinu maatiatri tegijil kõgõ kukrun tiksu, tuu hoit tsihi selge.
Rahmani Jan
Karula tiatri mängse tükükeisi etendüsest «Lell». Tükk paistu silmä tuuga, et kõgõga oll’ kõvastõ vaiva nättü: nii muusiga, kujondusõ ku ka näütlejätüüga. Rahmani Jani pilt
Mitmõn tükün olli naasõ pantu miihi mängmä. Tuu om kül kulunu trikk, a mõnõl puul vast hädätarvilik kah, ku näütetrupin õnnõ naasõ omma. Tõsõst külest and hää mängmine niimuudu ka koomikat mano. Pildi pääl tandsva etendüse lõputandsu Puiga ja Vahtsõliina naasõ. Rahmani Jani pilt
