Pääle Tarto meditsiinikooli lõpõtamist olle tüülesaatminõ. Kohe saadõti, sääl pidit kolm aastat tüütämä.
Ma tahtsõ kimmähe Tartohe jäiä. Valli oll’ kolmõ tüükotusõ vaihõl: latsihaigõmaja, väikulatsikodo ja sünnütüsmaja. Tuud viimäst ma pelksi väega väikeisi latsi peräst. Valõ latsihaigõmaja ku tutva kotusõ, olli sääl praktikal oln
Olli nuur õdõ ja mälehtä, et kõgõ rassõmba olli 24tunnidsõ valvõ. Üüse pidit kõgõ jalgo pääl olõma. Nigu tooli pääle istsõt, tull’ sussisahinaga vanõmb õdõ ja aiõ pistü.
Sääl saiõ kül egäsugutsit asjo tettüs, eski kümnepääväst last sondiga söödetüs.
Meelen om aastavaihtus 74/75. Meil olli pidosöögi lavva pääle nõstõtu ja pidimi joba lauda istma, ku üts väikene latsõkõnõ naas’ krambitama. Mülläsimi ja ravisimi tedä üü otsa, a vaesõkõnõ kuuli iks hummoku är. Peräh tull’ vällä, et täl oll’ katõpuulnõ tävvüpalanik ja ajupalanik. Tuul aol olliki latsil päämidses surma põhjustajas mitmõsugudsõ palanigu ja verevähk.
Tüüti viil siin ja sääl, a kõgõ kavvõmbas jäi tüüle traumapunkti. Tüü oll’ rassõ, a huvitav. Rutiini es tekü. Egä trauma oll’ esimuudu ja esi ollit kõik aig sündümiisi keskel. Kül oll’ avariisid, madalalt ja korgõlt sadamiisi, pessmiisi, tüütraumasid ja esi suurusõga haavu.
Kunagi pääle 90ndit oll’ jäl suur tüült vallalõ tegemiisi aig. Arstõl es lubata pääle 65 aasta sünnüpäivä inämb tüül kävvü. Tuuperäst es jakku arstõ. Meil traumapunktin üüse kohapääl arsti es olõki. Valvõn oll’ ütsindä osakunna traumatoloog ja ku tä oll’ mitmõtunnilidsõl lõikusõl, sis tull’ õdõdõl lihtsämbä as’a esi kõrda aia ja haava kinni ummõlda.
Latsiga oll’ rassõ. Nä pelksivä ja es lasõ ummõlda ja kipsi tetä. Latsist oll’ kõgõ rohkõmb hallõ kah.
A kõgõ rassõmb oll’ pur’oh inemiisiga. Nä es kullõ sõnna ja tulli eski meile kallalõ. Peräh kül võeti haiglahe turvamiis tüüle. A tä ka es saa kõgõ näist jako ja sis kutsuti politsei. Ütskõrd lätsi kats jõuku mi kalitorin kaklõma, sis tulli jo kipõ-reagiirjä kohalõ.
Hääd miilt oll’ kah – ku mõni kõrv vai skalp saiõ päähä tagasi ummõldus.
Pääle 36 aastat traumapunktin tüütämist olõ jo nii pall’o nännü, et veidü om elon asjo, mille pääle viil hiitü.
Urmi Aili
Traumapunkti opitarõn, jalg sai õnnõligult är ummõldus. Pilt Urmi Aili pildikogost
Pensionär Urmi Aili kirotas, et läbi terve elo om tedä saatnu tüü. Kül tull’ varahadsõn latsõpõlvõn aiavillä
kitsku ja lehmi kar’ata, kolhoosipõllu pääl kõblada ja kar’alauda man hainu küünü aia.
A tan om juttu noist suurõpõlvõ ammõtiist, midä tä om opnu vai kon tüütänü.
