Seod nimme kand Eestin 25 inemist. Panti taa katõn kotussõn: Urvastõn ja Märjamaal. Üts kotus oll’ Vahtsõ-Antsla mõisa, kon nime Nowek sai valla kuulmeistre Mango ehk Mäe-Matsi Mango uma perrega. Näütlejä Noveki Eva, kinkal oll’ õkva 100. sünnüaastapäiv, oll’ peri seost suguvõsast. Tõnõ kotus oll’ Valgu mõisa, kon nime Nowek sai Tentso Hansu pere.

Mõlõmban kotussõn om nimi võet piiblist ja juudi kultuuriperändüsest. Iisraeli ülembpriistre rõnnakilbi pääl pidi legendi perrä olõma 12 sorti vääriskivve. Tõsõ ria edimäne kivi om tähistet sõnaga נֹפֶךְ [n’ofeh], miä 1739. aastaga piiblitõlkõn om Nowek ja Noweki-kiwwid (näütüses 2Ms28:18). Täämbädse päävä eestikeelidsen piiblitõlkõn om tiidüse perrä lövvet, et tuu kivi om türkiis. Saksa piiblitõlkõn om hoobis tõist värvi kivi – rubiin. Niimuudu tõlksõ ka näütüses Gutslaff 17. aastagasaal, a piibli tõlkmisõl tal’na kiilde saadi joba arvu, et Lutheril om tuu asi vähä müüde pant. Et es olõ kimmäs, mis kivi tuu periselt oll’, tetti õigõ otsus ja panti tõlkõ sisse heebreä originaalsõna.

Vahtsõ-Antsla oll’ sääne mõisa, kon piiblist võetuid nimmi ja sõnnu panti priinimmis Võrumaal kõgõ rohkõmb. Suur osa talupoigõst oll’ tan joba üle 70 aastaga velisside usku (hernhuutlus) tunnistanu. Velissideusu manu käve ka jutlusõütlemine, piibliseletämine ja piibli lugõminõ. Just peremehe ja muidu korõmban hinnan inemise saiva tan priinime piiblist.

Valgu mõisa paistus silmä tuu poolõst, et rõnnakilbi vääriskivve nimetüisi panti nimes terve seeriä. Perekunnanimmi pandmisõ raamatun omma piaaigu järjest säändse nime nigu Nowek, Oniks, Sawir ja Rubbin. Ka muidu om piibli tan teemas olnu, näütüses nime Mose, Mirjam, Jarmut, Paran, Parnabas ja tõõsõ.

Saarõ Evar

Rubriigin kõnõldas perekunnanimmi periolõmisõst ja tähendüsest.