Minevä nädäli lõpun käve kultuuriministri Purga Heidy Võro maakunnan külän. Tä sai tan kokko paigapäälitside kultuurikõrraldajidõga, eräle viil Võro instituudi direktriga, ja läts’ edesi Setomaalõ. Uman kipõn graafikun löüdse tä väiku ao Uma Lehe küsümüisile vastada.
* * *
Mi kandin om hulga vägevit kultuurinaisi, näütüses Kalkuna Mari, Hintsi Anna, Laanõ Triinu, kiä omma jõudnu uma loominguga Eestist välläpoolõ. Nimä ütlese, et näide loomingu põhi om Võromaa perimüskultuur ja seo kandi kiil. Midä kultuuriministeeriüm saa tetä, et ka tulõvikun säändsit võimsit luujit tulnu?
Eks seo om kõik ti hindä kässin, nigu üteldäs. Ja tan om Võro instituut, kiä piäs kimmäle umma kullisilmä pääl hoitma, et tan kõik kinäste laabunu. Seo omgi kultuuri mõttõn riigi paiga pääl olõminõ tankandin, läbi Võro instituudi.
Midä mi kandi kultuuriinemise pidänü tegemä, et kultuuriministri rohkõmb siiä kanti jõudnu?
Tulõ hindäl inämb aigu löüdä, kutsit om hulga. A egä kõrd, ku siiä tulõ, lätt süä lämmäs külh. Joba eelä õdagu siiä jõudõn ja paigapäälitside kultuurividäjide ja kõrraldajidõga kokko saiõn tekkü suvõ pääle järekõrd, et tulõ iks siiä tagasi tulla. A ma olõ tan iks käünü kah, ka mitteammõtlikult. Õga sis külänkäügi saa-i õnnõ ammõtligu olla, inemiisiga saa tõistmuudu kah kokko saia. Kultuurisündmüisi nimekiri om tan väega kirriv ja ma olõ näist iks ossa võtnu. A tulõ lihtsäle siiä tulõkis tihtsämpä aigu löüdä.
Määndse omma Ti hindä kokkoputmisõ lõunaeesti keele ja kultuuriga?
Õks mul om määnestki kokkoputmist, a egäpäivi seod inämb väega ei kõnõlõ. Ma olõ Elvast peri ja Elva om jäänü kohegi murdõkiili ristumisõ tii pääle. Sääl om lõunõ puult, Võro puult tulnu rahvast ja sis om Villändi puult tulnuid kah. Mu vanaesä om Villändi kandist peri, mu koton kõnõldi säänest mitmõsugumast murdõkiilt. Peris puhast murrõt ma kõnõlda ei mõista, võiolla kunagi opi är. A õks tiiä säändsit ütlemiisi nigu «pliita alla», «kalidori pääle» ja «tuu või olla kül». Sääne oll’ kiil, midä kõnõldi egän koton. Seost massa-i määnestki uhkust tetä täämbädsel pääväl, sääne oll’ harilik kodoelo kõigi jaos.
Küsse Rahmani Jan
Kreutzwaldi muusõumi juhataja Hollo Aimi kultuuriministrile muusõummi näütämän. Rahmani Jani pilt
