Piimäkuu pakk võrokõsõlõ umajago umakeelist tiatrit: Ähijärve veeren mängitäs aoluulist draamat «Lell» ja Lutsu külän lustilist luku «Marss».

«Lell» om säet püüne pääle Rahmani Jani sama päälkiräga näütemängo perrä, mille põh’as omma elolidsõ johtumisõ. Lavastajatüü om tennü Trolla Agu (Tubina Taago tugõmisõl) ja mäng Karula tiatri.

Lavastusõn rännätäs tagasi 1940. aastidõ sisse ja tetäs eläväs Plaagi talo lugu. Inemiisil tull’ tuudaigo löüdä viise, kuis ello jäiä. Kõigil seo muidoki kõrda es lää. Ummõtõgi es jää elo tuul rassõl aol saisma – iks löüti võimaluisi, kuis elohimmo hoita.

Etendüse seen mindäs lootsikidõga üle Ähijärve ja piätüisi tetäs mitmõn mängokotussõn. Seo and julgustust, et huvilinõ saa tõtõst ossa läbielämisetiatrist (elamusteater), nigu reklaamin lubatas. Üleskitmist olõ-õi külh inämb vaia tetä, selle et kõik etendüse omma vällä müüdü.

Lutsu külän mängitäs piimäkuu keskpaigast alatõn võrokeelist lavaluku «Marss», mille kotsilõ om üteld, et ullis minemiseni nall’alinõ ja saman palotavalt hallus. Säändse tundõ om näütemängo sisse kirotanu Ruitlasõ Olavi ja lava pääle tuu seo Eensalu Ivo üten Lutsu tiatri rahvaga.

Tükk kõnõlõs üte väiku külä elokeskkunna häädümisest. Tollõn om uma osa Muski Elonil kah, kelle järgmädse plaani omma köüdedü üte jao küläinemiisi Marsi pääle saatmisõga. Kavvõst om kosta polügoonijõrra ja uma templi om küläelo pääle vaotanu ka kõkkõ ilma kokko köütvä Rail Healtic. Eloliidsi küsümüisi om pall’o, a vast and tükk vastussõ kah, kas külärahvas sutt seost mulgust vällä ronni.

Lavastust mängitäs vaban õhun Lutsu kivipurutamisõ platsi pääl.

Kabuna Kaile