Lehekuu 18. pääväl oll’ Kangsti külämajan umakandi lõõdsamehe Lindmõtsa Harri ja Moostest peri Hinrikusõ Henriku vahtsõst vällä tulnu lõõdsaplaadi «Kodutaeva all» kodudsõ olõmisõga näütämiskontsõrt.

Muistitsidõ mängunippega tõtõlinõ lõõdsamiis Harri ja seoilma mängumooduga koolitõt ja joba tuntust kogunu lõõdsa- ja laulumiis Henrik kanni ette lugusiid plaadi päält ja muialt. Kõik tellidü luu saiva kah är mängitüs. Lõõdsapallu vahepääle pajativa ülesastja mõnusiid juhtumiisi plaadi tegemise aost ja ülepää pikäst pillimehe elust. Esi ao mängumiihi mängumuud kõlasi imekinäste kokku.

Kullõjis oll’ paiga pääle tullu pall’u rahvamuusigahuviliisi nii lähküst ku kavvõmbalt, hulga lõõdsa- ja pillimiihi ja esiki mitmõ väega tuntu tegijä nigu Visla Enrik pojaga Haapsalust ja Põldsepä Margus Viländimaalt, kes kah pilli üskä haari ja rahvalõ pillilugusiid esitivä. Mõlõmbiidõ juurõ omma kah muiduki siistkandist.

Küläseldsi noorõ üllätivä väiku kodukohvikuga. Kangsti küläselts tennäs Harrit ja Henrikut, pääle tuu ka kõiki küläliisi mõnusa kodudsõ õhkkunna, üttehoitmisõ ja kinä olõmisõ iist!

Visseli Malle, Kangsti küläseldsi iistvidäjä

Lindmõtsa Harri ja Hinrikuse Henrik plaadiesitlüskontsõrdil pilli mängmän. Visseli Malle pilt