Kalkuna Mari ello kutsut festival «Aigu om!» pidä seo aastak väikut juubõlit: säänest aigladsõmbalõ ja luudusõlähkümbäle elolõ kutsvat sündmüst peetäs joba viies kõrd. Timahava om festivali alapäälkiri «Juuri mano», miä tähendäs, et mitmõ tegemise omma kannõdu mikandi põlitsõst perändüsest. 10.–16. hainakuul peetävä festivali päämidse tegemise tulõva Viitinä, Rõugõ ja Paganamaa kandin.
Mari tuu timahavatsõst kavast edimält vällä vägevä küünükontsõrdi. Avakontsõrdi and Setomaa miis Andrelleri Iisak uma vahtsõ bändiga «Epifolium caterva», näide kõrval astva üles Vunderi Eva-Lotta ja Meistri Madis.
Tõsõ päävä küünükontsõrdil tulõva püüne pääle võro lauligu: Kuslapuu Kaisa, Kalkuna Mari, Rahmani Elo ja Jan, Sommeri Lauri ja Ilvese Aapo. «Oll’ sääne tunnõ, et om vaia kaiba tsipakõsõ juuri ja tuvva kokko umakandi vägevit laulutegijit. Võro laulikit säändsen kuunsaisun ei olõ varrampa kuultu ja mine tiiä, kas tulõvikun saa kuulda säänest seltskunda üte lava pääl,» kõnõlõs Kalkuna Mari.
Kolmandal õdagul astus Mari üles uma soolokontsõrdiga, päält tedä Tuksami Jaak ja Agana Ain ja edesi lätt viil Jaapani laulja ja helüluuja Jun Futamata üükontsõrt.
Puulpääväne päiv om festivalil Viitinä päiv, kon tegemiisi jakkus nii väikuilõ ku suurilõ. Kiränik Kauksi Ülle kõnõlõs uskmalda juttõ Viitinä mõisaprovvast von Krüdenerist, üles astus Paganamaa Brass, om kohvikit, tegemiisi ja näütüisi. «Viitinän om sääne herksä kogokund. Om pall’o nuuri, mu põlvkunna rahvast tulnu siiä, kõik tegevä midägi,» kitt Kalkuna Mari.
Pühäpäiv om festivalil Rõugõ päiv. Festivali perämädse päävä omma mõtsapäävä Rõugõ kandin ja Paganamaal.
Üts jago timahavadsõ festivali tegemiisist om kinonäütämine Rõugõ rahvamajan. «Kolm õdagut näütämi üükinno. Pühäpäävä om salalinastus, Viimse Kullari vahtsõnõ film, midä viil kinon ei olõ, ütest umakandi mehest, a ma ei või viil üteldä, kellest,» jääs Kalkuna Mari salahadsõs.
«Aastidõ joosul om kogokund «Aigu om!» kasunu torõdas ja kimmäs. Seo programm om kogokunna toel ja jõul kokko pant: muusigu, liikmisaktivisti, paigapäälidse ja muu tutva luuja, kõik omma midägi vällä paknu. Nii taa programm sünnüski: egäüts pand midägi mano ja kokko tulõ üts «Aigu om!»,» seletäs Kalkuna Mari.
Festivali täpsempä kavva saa kaia internetist kodolehe aiguom.ee päält.
Rahmani Jan
Festivali ellokutsja Kalkuna Mari Viitinän «Aigu om!» küünü man. Rahmani Jani pilt
