11. hainakuul tetti Võromaa muusõmin vallalõ Mäetammõ Marko juubõlinäütüs «Teekond tundmatusse». Näütüsele omma kokko kor’adu kunstigu kolmõ loomingulidsõ aastakümne tähtsämbä tüü ni osa näütüsest om Võro liinaruumi kah jõudnu.
Mäetammõ Marko om üts esierälidsembit Eesti täämbädse ao kunstnikkõ, kiä kaes uman loomingun innekõkkõ pingõt inemiisi umavaihõlidsõn ja ütiskundlikun läbikäümisen ni polm sinnä alasi pall’o nall’a ja pilkust. Võromaa muusõumin 11. mahlakuu pääväl vallalõ tettüle näütüsele om Mäetamm valinu uma kolmõkümne toimõndamisaasta tähtsämbä tüü, miä üteliidsi avitasõ parõmbidõ arvo saia timä mitmõsugutsist luumisaigõst. Loomingut lövvüs egäsugutsõn vormin joonistuisist installatsioonini. Näütüse kokkosäädjä, maalikunstnik Kongi Kristi tävvendäs Mäetammõ luudut ummamuudu ruumitunnõtusõga ja om loonu värvikireviide sainuga saalist umaette kunstiteosõ.
Osa näütüsest sünnüs Võromaa muusõumin paigapääl. Mäetamm vii uma loomingu lühijuttõ ni pilte kujol püsünäütüse saali, et näüdädä paiga aoluku uma kaemisõ perrä ja kävvü veidü läbi muusõumi eksponaatõga. Tekste kirotõn sai Mäetamm innõkõkkõ mõttit Võromaa aoluu näütüsest. A kunst jõud installatsiooni kujol ka muusõumi sainu vaihõlt Katariina allee pääle. Sääne mõtõ tull’ Mäetammõ 2011. aastaga teosõst «Postkaardid Pariisist», andõn kunstnigulõ huugu luvva Võrol kah pargipinkele võrokeelidse mõttõmulli ni katõkõnnõ. Mõttõmulli kujotasõ katõ uulidsa pääl kõndja vaihõl sündüvät jutuajamist vai esiki mõttõplahvatust. Seo installatsiooniga taht Mäetamm kittä võro kiilt ja kultuuri.
Näütüse vallategemisel sai kunstnigu hindäga kah jutu pääle.
Kas Võro…
…õhk tege vabas? Jah, tege külh! Ja mitte õnnõ, tan looming kasus ullimuudu. Ku mõni aig tagasi siiä tulli, istsõ maaha ja mugu kiroti. Ma ei tiiä, kas tuud mõotas määnegi Võro vibe vai hõng, a loomingut tugõja olõminõ om tan olõman külh.
A mille sa just Võrolõ hindä juubõlinäütüse tõit?
Ma olõ esi (Karksi-)Nuiast. Ja ku ma Võrolõ ütskõrd jõudsõ, saie arvo, et Võro tulõtas mullõ väega mu hindä kodokanti miilde. Ja sõs sääne mõtõ oll’ kah viil, et kõik näütüse ja kunst ei piä Tal’nan olõma. Ma taha tuvva kunsti sinnä, kon taad säändsen näütüseformaadin pall’o ei olõ. Ma esi kasvi üles kotusõ pääl, kon es olõ määnestki gallõriid. Kõik seo mõotas.
Miä om Võrol su jaos tähtsä vai mis mõotas?
Mullõ miildüs tan väega, selle et inemise, mõtlõminõ ni ütlemine omma kuigimuudu õgvõmba. Võrokõsõ omma õkvaütlejä. As’a saava tettü, kõik om sääne mõistlik ja loogilinõ.
Näütüs «Teekond tundmatusse» om Võromaa muusõumin vallalõ 7. süküskuu pääväni.
Raju Eliisabet
Katariina puiõria pääl või nätä võrokeelitside ütelüisiga pinke. Pildi pääl ajava juttu gallõrist Huulõ Jana ja kunstnik Mäetammõ Marko. Treiali Andrese pilt
