Eesti edimäne krimifestival tulõ Agatha Christie avvostajast võromaalasõ Orava Kati iistvõtmisõl 23. põimukuul Rõugõn. Põnõvust toova paiga pääle krimikirändüse as’atundja üten välläopnuidõ uurjidõga. Kõrraldajidõ sõnnu perrä või üllätüisigi ette tulla.
Agatha Christie kodokant om maalilinõ Devoni krahvkund ja õkva tuuperäst passis krimifestivali kõrraldamisõs niisama kinä Rõugõ. «Mägiläisi maja om väega midsomerlik kõrts ja Ööbiguoro villa uma romantilidsõ hõnguga om õkva ku luudu kelläviietii jaos,» kitt Orava Kati festivalipaiga häädüst.
Christie loomingu avvustaja sai Katist joba kooliopilasõ vannusõn. Timä kogon om üle 140 Christie raamadu ja tä om käünü kümnit kõrdo Inglüsmaal kuulsa kiränigu kodoliinan Torquayn ja suvõkoton Greenwayn. Torquayn peetäs egä aasta rahvusvaihõlist Agatha Christiele pühendedüt festivalli, kon pakutas pall’o põnõvat kullõmist ja tegemist. Säält saigi Kati mõttõ luvva midägi säänest uman kodokandin kah.
Midä mass festivalilt uuta? Eestläisile miildüse Briti krimisar’a ja britte kirotõdu muhekrimiluu läävä kah häste kõrda. Mille seo nii om, tuust kõnõldas festivali jututsõõrin üten Varraku kirästüse päätoimõndaja Kaera Krista ja krimikirändüse as’atundja Martinsoni Jaaniga. Filmi, raamadu ja periselo köüdüsse võtva jutus politsei- ja piirivalvõammõdi põh’a piirkunna uurja. Ummi krimikirändüse seen tegünüid mõttit jaga Võromaalt Plaanilt peri tõlkja Planhofi Maia, kiä om muu hulgan eesti kiilde ümbre pandnu üle kümne Agatha Christie raamadu.
Ööbiguoro villan pakutas festivali aigu kelläviietiid. Rõugõ rahvamajan om vallalõ kriminaalnõ raamadulaat ja müvväs muud teemä perrä kraami ni saa kaia Avinurmõ suvõtiatri krimijanti.
Ku küsü Orava Kati käest, kas tä ei pelgä, et Rõugõst saa krimiteemä vallalõ trulmisõ peräst Eesti Midsomer, vastas tä tävve kimmüsega: «Annami hindäst kõgõ parõmba, et peris krimilugu sääl viirdümä ei lää. Õnnõs omma meil paiga pääl uurja kah, kes kõgõl silmä pääl hoitva. A mille mitte Miss Marple’i muudu küpär päähä panda ja Poirot’ muudu vuntsi trulli aia ja esi asja uurma tulla.»
Krimifestivali kõrraldamist võtt iist MTÜ Krimiklubi, kon tege pääle Kati üten viil säidse naist üle Eesti. Kas edimädsele krimifestivalilõ tulõ järg, tuud näütäs aig. Timahavanõ festival om pühendet Agatha Christie 135. sünnüaastapääväle. Täpsembält saa kavva kaia veebilehe krimifest.ee päält.
Kabuna Kaile
Krimifestivali kõrraldaja Orava Kati Rõugõn Mägiläisi maja man. Kabuna Kaile pilt
