Võro liinapäivi sisse 17.–23. põimukuuni om timahava kokko kor’at hulga sündmüisi, sisseharinuist kooni vahtsidõni.

Seoaastadsidõ liinapäiviga omma näütüses kokko köüdedü perimüstandsu festival ja Võro maakunna laulupido.

Võro maakunna laulupido tulõ 20. põimukuul ja tuud peetäs Võro liinan ku jalotuskontsõrti: laulusõbra saava kullõlda kuurõ ülesastmiisi mitmõn esinemispaigan. Jalotus nakkas Käosõ Kareli iistvõtmisõl pääle kell 16.

Perimüstandsu festivalli peetäs 22.–23. põimukuul päälkirä all «Juubelikihlad» ja seo om ku sissejuhatus juubelipido mano järgmädsel aastal, ku festival saa 30aastagadsõs. Üts kontsõrdipaik om Lauluesä muusõumi huuv, tulõva laat, tandsuopitarõ ja teedüstandsminõ, niisamatõ massulda pikälavvapido, seokõrd Kandlõ aian üten ansambliga Regatt.

Liinavõimu kingitüs Võro rahvalõ andas seokõrd Tamula-viirse asõmõl üle Võro spordikeskusõ staadioni pääl: sääl ast üles ansambli Smilers. Kontsõrt om massulda. Liina hällüpäävä pidolisust nõst tunnustuisi vällähõikaminõ: andas kätte konkursi «Lilleline Võru» preemiä ja Võro liina avvomärgi.

Sünnüpäävänädäli sisse jääse ka vaskpillipäävä, mink seen om hulga kontsõrtõ üten galakontsõrdiga 21. põimukuu õdaguspoolõ Kandlõn.

UL

Pilt mineväaastadsõst Võro liina sünnüpäävänädälist. Pilt Võro liina FB lehe päält