16. põimukuu pääväl uut Võro seldsi vahtsõnõ põlvkund võro as’a huviliidsi Kaika suvõülikooli matkapääväle, miä seokõrd tulõ Tsoorun.
Päiv saa algusõ kell 12 Tsooru rahvamajan, kon kuulutõdas vällä suvõülikooli rektri, kiä seokõrd om Kuslapuu Kaisa. Rektri om hariligult suvõülikooli kandiga köüdet inemine. Tä tege väiku matka hindä jaos tähtside kotussidõ mano ja om suvõülikooli ideeline juht. Kuslapuu Kaisa om kõik uma latsõpõlvõ suvõ saatnu müüdä Tsoorun, pidä tähtsäs tuu kandi kirändusluku ja tund köüdüst nuuri inemiisiga, kiä võrokõisi vaimu mõista pruuvva.
Kellä 12–15 saa kullõlda loengit, miä pututasõ võro kiilt, aoluku ja kultuuri. Edimädsen plokin kõnõlas Kauksi Ülle kiränik Jaigi Juhan elost ja loomingust, Tsooru juuriga keeletiidläne Vaaba Janek lahksas Jaigi kirändüslist kiilt ja aoluku opnu Saarõ Hipp kõnõlas umast magistritüüst – võro keele olokõrrast Nõvvokogodõ aol.
Tõsõn plokin kõnõlas Võrolt peri arkeoluug Laasi Beti Ugandi muinasmaakunna piirest, Vahtsõliina juuriga rahvaperändüse uurja Laugu Getter Vana-Võromaa tandsukultuurist ja kohalik miis Puksingu Marko savvusannu ülelugõmisõst.
Kellä 15 aigu nakkas üten Kuslapuu Kaisaga matk Tsooru pääl. Pääle toda kell 17.30 tulõ jutuõdak Tsoorust peri filmitegijä Viimse Kullariga ja kaias timä tettüt filmi «Põrgu katlakütja».
19.30 või uuta väikut pito ja kontsõrti: üles astva Kuslapuu Kaisa, Rahmani Elo ja Jan.
Rahvamajan om päivä vallalõ kohvitarõ, suurõmba söögi piät esi üten võtma vai poodist ostma. Üritus om massulda. Oodõdu omma kõik, kiä tahtva targõmbas saia vai võro keelen häste aigu müüdä saata.
Kõrraldaja
