Põimukuu viimätsel nädälivahetusõl lätt Loosu külän Teppo lõõdsamuusõumi muro pääl eläväs: pillimehe ja -meistri Teppo Augusti 150. sünnüaastapäivä tähüstedäs konvõrendsi ja mitmõ kontsõrdiga.
Riidi, 29. põimukuul oodõtas huviliidsi konvõrendsilõ «Teppo lõõtspilli fenomen», kon kõnõldas eesti lõõdsamuusikast inneskidsest aost täämbädse pääväni, muidoki ka tuust, kuis Teppo lõõts seo edenemist seoniaoni kujondas ja mõotas.
Ku Teppo kodotalo muro pääl iintulõvist sündmüisist kõnõlami, pallõ pererahval, Augusti latsõlatsõlatsõl Teppo Priidul ja Mähari Kadril, vastada küsümüsele, mis Teppo pilli ummõhtõ nii esierälidses tege. «Iks helü om seo, midä hinnatas,» ütles Mähari Kadri. Võro keelen passis häste üteldä, et seo om Teppo timm. «Kül omma illatsõmba meistri püüdnü seod lahti muuki, pilli sammamuudu helü helü kaupa timmi aia, a ei olõ õnnistunu,» tävvendäs Teppo Priidu.
Piinümbält saa kõgõ seoga üten mõtõlda joba konvõrendsil, midä juhatas Noormaa Tarmo ja kon astva üles Kõivupuu Marju, Ubina Juhan, Särje Taive ja tõõsõ.
Puulpäävä mängitäs Teppo talon võiki, nigu perimüstandsu festivali aigu iks kombõs om saanu. Õdagu saa kullõlda võikimängmise lõõdsakuningidõ kontsõrti. Üles astva viis parhillast lõõdsakuninga nime kandjat: Ubina Juhan, Ojasaarõ Toomas, Leithami Richard Ott, Kadaja Rasmus ja Krüsbani Kert. Lõõdsakuningas saias sis, ku om ette näüdädä kolm võikimängmise tuusaklassi võitu.
Pühäpäävä jõudva Teppo Augusti kodotallo timä hindä tettü pilli. Tulõ väkev galakontsõrt «Teppod koju!». Pito, kohe oodõtas Teppo lõõdsa umanikkõ egäst ilmakaarist, peetäs kolmandat kõrda. Teppo Priidu sõnno perrä om näil kirän 30 Teppo lõõdsa umanikku, a kokko või pille ilman alalõ olla 50–60 tükkü. Kõiki pille ei olõ viil jõutu üle kaia ja kirja panda.
Kas iks om võimalik pilli periolõmist kimmäle kimmäs tetä? Priidu ja Kadri noogutasõ ütel meelel: pääle helü tõmbasõ Teppo lõõdsa man tähelepandmist hää maitsõga tettü kirä ja ilostusõ. Mähari Kadri ütles, et näil om ütine juun, a saman omma neo kõiki pille pääl esisugumadsõ. «Kon midägi ilosat näi, tuu ma perrä tei,» tulõt’ Teppo Priidu miilde vanavanaesä Augusti aokiränikõlõ üteldüt.
Põnõva löüdmise ei olõ viil lõppõnu, iks tulõ midägi vahtsõt vällä. Ildaaigu andsõ üts Tõrva provva teedä katõst kiräst, mille Teppo August om timä edevanõmbalõ saatnu, jutus iks pilli meisterdämine. Kirä ja pall’o muud tege nättäväs näütüs, miä kah pidopäivis valmis saa. Nigu CD-plaatki, kon pääl Teppo Augusti hindä ja timä perrätulõjidõ mängidü pilliluu.
Kae kõgõ kotsilõ täpsembält: lootsatalu.ee.
Kabuna Kaile
Mähari Kadri ja Teppo Priidu pillimeistre mälehtüse hoitmisõs luudu lõõdsamuusõumi iin. Kabuna Kaile pilt
