Minevä riidi lõppi Laube Kadri kõrraldõt rahvapillilaagri, midä osalidsõ kutsva kõrraldaja perrä Kata laagris. Sääne laagri oll’ mi kandin joba 27. kõrda ja perämädse aasta om taad peetü Kuudsil Mõnistõ koolimajan ja rahvamajan. Timahava oll’ laagrin üten oppajidõga 96 inemist.
Lõpukontsõrdil kannõti ette laagrin opituid pillilugusiid, sekkä laulõti mõni laul ja julgõmba võti tandsu kah üles. Timahavadsõ laagri tekk’ esierälidses suur hulk basskitarriopjit, noid oll’ kokko 11. Muidoki opiti laagrin egäsugumaidsi muid pille kah.
«Egä kõrd om sääne tunne, et oll’ aoluu kõgõ parõmb laagri. Periselt om egä laagri ossavõtjidõ näko. Timahavva näütüses oll’ laagrin opman Sepä Silver, kinkal olli üten mõsukausi. Teimi noidõga Mäe-Kolga talu basseinin tüütarõ. Vai laagri vabatahtlik, Tšiilist peri Tomas Del Real, kiä andsõ magamiskontsõrdi: ütel üül kogusi kõik laagrilidsõ rahvamajja, madradsi üten, ja saiva sällülde kontsõrti kullõlda. Säändse üllätüse andvagi jõudu,» jäi kõrraldaja Laube Kadri laagriga rahulõ.
Rahmani Jan
Rahmani Jani pilt
