Kooli päälenakkamisõ puhul kinge latsiaokiri Täheke ja Võro instituut kõigilõ 1. klassõ latsilõ võrokiilse Tähekese erinumbri. Aokirä saiva kõik võro keele opja ja oppaja kah. Tähekese võrokeelist erinumbrit andas vällä üts kõrd aastan ja sääne asi om käünü joba 20 aastakka.

Erinumbril om varrasügüse mekk man: Panga Milvi luulõtas siimnekurgist ja aiavilju sissetegemisest, Laanõ Triinu jutustas edimäste klassi minekist, Rahmani Jan tuust, kuis kuigina ei tahtu suvõst vällä tulla ja kuuli minnä. Holdsi Leila kirotas, kuis timäst sai kiränik, ja võrokeelitside raamatidõ lehekülg tulõtas miilde, et om raamaduaastak. Rahmani Jani jutt kõnõlõs Galapagosõlõ pagõvist kalost ja Püttsepä Juhani jutustas üte kuulsa poiskõsõ latsõpõlvõst Urvastõ kandin.

«Posti» rubriigin omma latsõ esi tsirgõst ja eläjist juttõ kirotanu ja pilte tsehkendänü. Luudusõ leheküle päält saa lukõ Vilbaste Kristeli luku aasta puust saarõst. Viil saa ütte-tõist teedä Eesti viinamarjust, saa meisterdä, koomiksit kaia ja nall’u lukõ. Ka mõni Tähekesele pilte joonistanu autor, nigu Mõttusõ Kadi, om Võromaalt peri.

Tähekese erinumbriid andas vällä ka seto ja mulgi keelen. Erinumbridõ välläandmist tugõ Eesti Rahvakultuuri Keskus.

Fastrõ Mariko

Tähekese edekaas