Vana-Võromaa suidsusannu kuuntüükogo iistvõtmisõl käü suidsusannu kokkolugõminõ, teedüst sannu kotsilõ om tulnu üle Eesti, kõgõ inämb om sannu kirja pantu Vanalt Võromaalt.

Sügüsedses käänüpääväs om ütenkuun maa- ja ruumiammõtiga valmis saanu suidsusannu võrgukaart. Nätä omma sannu asukotusõ, inämbüisi om man pilt sannast ja lühkü lugu. Peris kõik siiäni kirja pantu sanna kaardi pääl nätä olõ-i, näge õnnõ noid, mille umanik om lubanu kaardi pääle panda.

Sannu kaart näütäs prõlla põimukuu lõpu saisu, a kaarti naatas vahtsõndama egä kuu.

Sügüsedses käänüpääväs om kirja pant 560 sanna, teedüst om kogonu viil paarisaa sanna kotsilõ. Kiä olõ-i viil umast sannast teedä andnu, noil pallõldas sügüse joosul aigu löüdä ja võrgun küsümiseleht är täütä, link om lehe savvusann.ee pääl. Tuusama lehe pääl saa teedüst, kuis löüdä maa- ja ruumiammõdi lehe päält kätte suidsusannu võrgukaart.

Vana-Võromaa suidsusannakombõ omma UNESCO vaimlidsõ kultuuriperändüse esindüsnimistün aastagast 2014, a ku pall’o ja määndse mi sanna omma, määndsist kombist peetäs luku – tuu kuigi selge olõ-i. Sannaumanigõ hää abiga tahetaski prõllanõ sais selges tetä. Ettevõtmist tugõva Eesti Rahvakultuuri Keskus ja Eesti Kultuurkapitali Võromaa ekspertgrupp.

UL

Suidsusannu levik Eestin prõlladsõ teedüsse perrä.