Mäsu kängäpoodin Vinne aol
1985. aasta piimäkuun läts’ käümä viinajuumisõvastalinõ säädüs. Mis juunipüürdest vällä tull’, om esiasi…
Mõni aasta tagasi tei Eesti Rahva Muusõumilõ kirätüü Kommunaari toodangust, kon küsitli mitmit võrokõisi. Kommunaari kängä-saapa olliki Vinne aol päämidselt nuu, midä osta sai. Parõmba vällänägemisega importi tull’ nii veidü, et es jakku kõigilõ. A määne naanõ ei püvvä olla tõisist parõmb ja ilosamb!
Üts naisi kängäpoodi müüjä kõnõl’, kuimuudu as’aluu olli. Ku auto kaubaga Tal’nast tulõma naas’, oll’ pääl ka Antsla jago. Jutu lätsi liikma ja ku kaubaauto Antslast Võrolõ jõudsõ, oll’ Tarto uulitsal kängäpoodi iin joba hulga naisi. Mõnikõrd läts’ suurõs mäsus. Juhtu, et poodi uss lahuti är vai sai mõni vaheletrügijä obadusõ. Miilits kutsuti kõrda luuma. Poodi juhatajaherr pidi diplomaat olõma. Eestiaolidsõ Kandlõ tiatri näütlejänä toda tä sutsõ olla kah. Tahetut importi muidogi kõigilõ es jakku, tull’ leppü Kommunaari kotaga – nii kutsõ rahvas uma maa toodangut.
