Mis om parõmb ku jalgpall?
Ma kuuli raadiost, et nüüd saava inemise jälki sängürõõmu maitsa. Viimäne kuu aigu vahtsõva kõik telekast jalgpalli. A jalgpall om tiidäki parõmb ku midägi muud.
No parhilla om ka jalgpall moodulidsõs lännü. Ekä liigutust ja pallilüümist saa ekraani päält üle kaia. Selle vast omma kõik võistkunna kaitsja nii sirgõh rivih nigu tsaariarmee soldani. Puutri päält kaias õkva millimiitre päält üle, kas oll’ sulusais vai es olõ.
Sulusais om kül innembä talomehe sõnapruuk. Eesti inemise tiidvä, et sulgu pandas eläjä, näütüses tsia ja lamba. A ku ingläse jalgpalli riigli vällä mõtli, sõs nä pelksi, et mäng lätt õnnõ ilma mõistusõlda palli värehtihe pesmises. Lambakar’a muudu pallimängu vasta omgi tuu sulusais tettü. Nii joostas mängu aigu pall’o, a värehtihe lüvväs palli veidü.
Mis tuust, et pall om tsõõrik vai hoki mano käü ka kepp. Kõgõ parõmb sport om iks ralli.
Lasõ minnä, Ott, anna paaru!
