Tsialiha ja kapsta?
Ma kuuli raadiost, et Eestimaa söögitiidläse omma tennü hernest nii hää lõhekala, et näile anti eski hulga avvohinnarahha. Hernist saa tetä säändse mekiga süüki, mille magu om õkva nigu kanalihal vai tsialihal. No hää külh, ku inemine ei taha umma elos vaia olõvat valku saia lihast, sõs tuu om timä asi. A mille piät tuu kasvõst tett süük olõma liha maiguga? Sõs võissi jo lihha kah süvvä. Olõ-i kuulnu, et lihasüüjä proovissi tetä peedimaiguga kotletti vai põrknamekiga viinerit.
Tulõgi vällä, et jõululavva man piät kimmäle kaema, kas liha om iks lihast ja kapsta omma kapstist. Vai om jõulusüükega säänesama petüs nigu tuu verevä palto ja valgõ habõnaga vanamehega. Päält kaia om tutva, a tiiä-i, kiä sääl rõividõ all periselt om.
