Olümpiämängõst
Ma kuuli raadiost, et Pariisi olümpiämängõl magasõ sportlasõ papist sängüh. Tuu tekk’ kõikilõ pall’o nall’a, a näütäs, et inemise tiiä-i füüsikast midägi. Ku õigõlõ ehitä, saa papist kimmämbä sängü ku kehväste tettüst metallist. Papist torrõ sisse valõtas betoonist vundamendipostõ ja hollandlasõ omma papist majagi pistü pandnu.
A Pariis om meile tähtsä. Õkva sada aastat tagasi võitsõ Pariisi olümpiämängõlt kuldmedäli Pütsepä Eduard. Tä oll’ edimäne eestläne, kiä maadlusõh kärbläsekaaluh kulla tõi. Pütsepä Eduard oll’ Võromaa miis. Minevä sügüse tetti Lepässaarõ raudtiijaama pargih tälle mälehtüskivi kah vallalõ. Jo sada aastat tagasi oll’ tiidä, et kimmä spordimehe tulõva maakotussist. Ka seokõrd omma Lõuna-Eestist peri sportlasõ häste võistõlnu. Olõmi näide üle uhkõ.
