Äriplaan
Ma kuuli raadiost, et Tarto liin lassõ suurõ korsna niisama õhku, a olõs võinu tuust suurõ kultuuripääliina pido tetä. Mis lännü, tuu lännü, ega korsnat inämb tagasi pistü ei panõ.
A järgmädses suvõs võissi Võromaal midägi säänest planiiri üteh suurõ rahvapidoga. Näütüses lasõssi Munamäe torni õhku. Asõmõlõ saassi ehitä moodulidsõmba ja korgõmba, kost midägi nätä kah om. Rahvaperimüse perrä ehitedi sinnä edimäne torn katssada aastat tagasi. Pääle tuu om kümnit kõrrast korõmbit tornõ ehitet. A puu kasussõ kah kõrrast korõmbas. Parhillanõ katõssakümmend viis aastat tagasi ehitet torn om kah jo korgõmbas tettü, a iks jääs madalas.
Arvatas, et kohaligu umavalitsusõ võissi tetä turismimassu. Munamäe kaemisõ iist saasi massu mito kõrda võtta. Kõgõpäält tahtva kõik eestläse viimäst kõrda vanah tornih kävvü ja masva. Sõs tulõva õhkulaskmist kaema ja masva. Sõs saa vana torni kivikaupa suvõniires müvvä. Vahtsõ torni ehitämise kaemisõs või piletiid müvvä ja ku ütskõrd vahtsõnõ torn valmis, tulõva jälki kõik kaema. Ja massuraha mugu tulõ.
