Rummal kingitüs tõi kõva karistusõ

 
Antslan elli üts vallalinõ keskiäline naanõ, kellele miildü pitu pitä. Täl oll’ tulõman sünnüpäiv, kohe tä kutsõ hulga rahvast.

Kõik naksi sis kingitüisi kokko ostma, a et es taheta väega kuluta, kingiti inämbüisi raamatit. Üts miis, kedä kül sünnüpääväle kutsut es olõ, tahtsõ kah minnä. Tä mõtõl’, et tege tõisist ilosamba kingitüse, sis vast ei panda pahas, ku tä kutsmada lätt. Tuudaigu olli moodun Brežnevi pakikõsõ. Miis mõtõl’, et tege tuu perrä üte nal’a.

Antsla raudtiijaaman oll’ saina pääl Brežnevi pilt. Miis võtsõ pildi säält maaha ja mõsksõ kärbläsesitast puhtas. Otsõ sis uhkõ paprõ ümbre ja tekk’ viil uhkõmba roosa sleihvi kah pääle.

Ku sünnüpäiv vallalõ läts’, saisi kõik ütstõõsõ takan rian ja anni kingitüisi üle. Mehel oll’ kõgõ suurõmb pakk kangli all ja kõik tahtsõva nätä, midä suurt tuu miis sünnüpäävälatsõlõ kingis tõi. Pakk võeti vallalõ ja säält tull’ vällä daragoi Leonid Iljitš.

Pidu läts’ kinäste edesi, a perän juhtu iks tuu, et kiäki oll’ mehe pääle kaivanu. Miis es olõ pidol salahust kah tennü, et tä jaamast tuu pildi võtt’. Asi aeti ammõtligus ja miis viidi katõs aastas kinnimajja. Säänest karistust pidi tuudaigu kandma nal’ana mõtõldu kingitüse iist.