Herevüse vasta avitas mõts
Ma kuuli raadiost, et inemiisi herevüs om nii suur, et mõista-i inämb kuikimuudu auru vällä laskõ. Vot sõs tulõ mõtsa minnä. Mis sõs, et kikkasiini kokko ostmisõ hind om alla lännü. Mõtsa tulõ minnä mitte raha, a hindä peräst. Pall’o parõmb om samblõ pääl kõndi, ku piä-i egä seene man raha pääle mõtlõma. Sõs panõt tähele, mis su ümbre ja su hindä seeh sünnüs.
Mõts om nigu kerk, koh heng saa puhkust ja rahhu. Läävä pääst är murrõ ja mõttõ, mis saa tsikoga vai midä periselt kõnõldi katõ kõva mehe kokkosaamisõl. Vanastõ üteldi, et tsia tapat är, a miä ulliga tiit. Selle tulõgi herevüse iist mõtsa minnä, sinnäni maailma ull’usõ ei küünü.
Muda Mari
