Valimi esi!
Ma kuuli raadiost, et kõik inemise tahaki ei valima minnä. Näil ollõv poliitikast viländ. Vet ma olõ kah nännü nall’u, et poliitikil olõ-i ei süänd ei munnõ ja näil võit pää ja perse är vaihta, ilma et midägi arvu saia olõs.
A poliitik om kah kunagi inemine olnu. Mi kõik võissi esihinnäst valimiisilõ üles säädi ja pruuvi valla vai liina asju üle otsustama naada. Ku sa olõt vähägi inemine, ei saada sinno ütski valimisliit minemä. Seokõrd olõmi külh ildas jäänü, a kae, pia tulõva järgmädse valimisõ.
Seokõrd saami minnä umma hellü andma. Valimi iks noid inemiisi, kiä kõnõlõ-i tõisi kotsilõ halva, vet olõ-i kiäki ilma vikolda. Ärmi noid kah valimi, kiä hinnäst väega kitvä ja maa ja ilma kokko lubasõ. Valimi lihtsäle hää inemise, kellest tiiämi, et tä mõtlõs tõisi pääle kah. Valimi esi, sõs om häste valitu.
Muda Mari
